MNYF-in CM an chhuang

Mizo National Youth Front (MNYF) chuan thuchhuah siamin, February 1, 2022-a sorkar laipui budget pharh takah Prime Minister’s Development Initiative for North-East (PM-DeVINE) hnuaiah Mizoram tana cheng vbc 600 dah a ni chu lawmawm an tih thu leh, hma latu chief minister Zoramthanga an chhuan thu an tarlang.

MNYF chuan, PM-DevINE chu sorkar laipui ruahmanna thar a ni tih sawiin, "Hmarchhak state tan cheng vbc. 1,500 dah a ni a, a zatve dawn lai chu Mizoram chanpual tur a ni. Hmarchhak state dangte thîk tham khawpa Aizawl by-pass road siamna tur cheng vbc. 500 leh bamboo link road laihna tur vbc. 100 dah a ni hi Mizoram tan bung thar pawimawh tak leh hmel thar hmuh theihna tur a ni a, ropui kan ti hle," an ti.

MNF ṭhalaite chuan, Aizawl tlâk lama khawpui hêlna kawngpui laihna tur ruahman chu kawng ṭangkai tak, lirthei lian zawkte tan khawpui lut loa hêlna remchang tak a nih ngei an rin thu leh bamboo link road laihna tur cheng vbc. 100 chuan Mizoram tan rah ṭha tak a chhuah an rin thu an tarlang.

Hripui léng vanga harsatna lian leh khirhkhân tak a awm mek laia thu lawmawm tak hriat tur a awm chu CM Zoramthanga vang a nih thu an sawi bawk.