District tinah positivity rate 10% a tling

February 3, Ningani khan Mizoramah Covid-19 vei mi 1,956 hmuh chhuah a ni a, positivity rate 30.91% niin, district tinah positivity rate 10% chung lam vek a ni. Nimin khan hripui vei dam tawh mi 2,406 chhuahtir an ni a, Covid-19 vei mi pakhat a thi.

Ningania hripui vei hmuh tharte chu mipa 841 leh hmeichhia 1,115 an ni a; RT-PCR hmanga hmuh 509, TrueNAT hmanga hmuh 51, RAT hmanga hmuh 1,361 leh FIA hmanga hmuh 35 an ni.

February 3-a swab sample endikna district 11-te chu positivity rate 10% chung lam vek a ni a, district parukah 20% chung lam niin, district paliah 30% chung lam a ni. Positivity rate sanna ber Aizawl district-ah 37.19% a tling a, a hniamna ber Khawzawl district-ah 11.02% a ni thung.

Nimin tlai dar 5 thleng khan hripui vei dam tawh mi 2,406 chhuahtir an ni a; district tina chhuak zat chu - Aizawlah 1,586, Kolasib-ah 196, Saitualah 151, Lungleiah 145, Champhaiah 119, Mamitah 98, Serchhipah 60, Hnahthialah 23, Lawngtlaiah 20, Khawzawlah paruk leh Siahaah pahnih an ni.

IDSP record angin, Mizoramah Covid-19 vei 1,81,696 hmuh chhuah a ni tawh a, mipa 85,788 leh hmeichhia 95,908 an ni a, mipa aiin hmeichhia 10,120-in an tam zawk. Nimin tlai dar 5 thleng khan mi 1,67,853 (92.38%) chhuahtir an ni tawh a, mi 618 (0.34%) thi tawhin, enkawl mek mi 13,225 (7.28%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,81,696 chu mi 1,000 zelah hripui vei mi 165 an awm ang a ni a; mi 1,00,000 zela Covid-19 vangin mi 56 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. February 3, 2021 thlenga swab sample endik tawh 16,98,990 aṭanga RT-PCR hmanga endik zat percentage chu 20.67 a ni a, RAT hmanga endik zat chu 73.62% a tling.