Congress sorkar hunah sorkar hnathawkte a hun takah hlawh kan pe ang - Zodintluanga

Congress Legislature Party (CLP) leader Zodintluanga Ralte, MPCC treasurer ni bawk chuan, MNF hruai Mizoram sorkar chu sum enkawlah a hlawhchham tih sawiin, Congress party an sorkar leh hunah chuan sorkar hnathawkte leh central scheme hnuaia thawkte a hun takah an hlawh an pek zel tur thu a sawi.

Nimina Kawnpui Venglai Branch YMA Hall-a Tuirial Bial Block-I Congress Committee inkhawmpuiah thu sawiin Zodintluanga chuan, "Tun sorkar hi sum enkawlah a hlawhchham a, mipuiin nasa takin kan tuar mek. Sorkar hnathawkte hlawh pek tlai, GPF pek theih loh, central scheme hnuaia thawkte thla tam tak hlawh bat leh pensioner-te pension benefit pek theih lohte hi a manganthlak tak zet. Kan sorkar leh hunah chuan sorkar hnathawkte leh central scheme hnuaia thawkte a hun takah an hlawh kan pe ang," a ti.

Zodintluanga Ralte chuan, sorkarin SEDP sem a tum thu tun hnaia a puan laiin, Health Care Scheme bill mipuiin an hmuh theih loh thu leh pawisa awm lo tih chu ni tina ram hruaitute ká aṭanga hriat a nih thu a sawi a, "Nikum budget-ah khan hmasawnna tura dah a awm lo a, sorkar hnathawk hlawh chauh kan pass a ni," a ti a; mithiamte'n tun ang renga sorkar a kal theih loh an hlauh tawh thu a sawi.

CM Zoramthanga buaipui ber mau/rua chìnna hmun a hmunah an en thu sawiin Zodintluanga chuan, "CM buaipui ber hi kum thum hnuah pawh a hlawhtlinna hmuh tur a awm lo. Tun ṭum SEDP sem turah CM âtchilh ber mau an telh lo hi a naute hian an ring tâwk lo tihna a ni, amah hi dreamer kan tih hi a ni ta berin a lang," a ti.

CLP Leader chuan, sorkarin SEDP sem a tumah MNF party unit-te chu a dawngtu tur thlang tura ruat an nih thu sawiin, "MNF unit-te hi SEDP dawngtu tur thlangtu atan an hmang niin a lang a, mipui chhiah tling khawm, mipui sum heti mai maia sem ral tur a ni lo," a ti a; Congress party chu Mizo ram leh hnam siam nan Pathianin a ruat tlat niin a sawi bawk.