Siaha MJA-in inkhawmpui an hmang

Mizoram Journalists Association (MJA), Siaha District chuan nimin khan Siahaa IPR auditorium-ah Annual Conference vawi 38-na leh MJA golden jubilee lungphun hawnna hun an hmang a; resolution siamin, Mizoram Journalists Pension Scheme tihpuitlin a ni dawn ta chu lawmawm an tih thu an tarlang.

Siaha district MJA Annual Conference hi treasurer Lalnunkima Pisa-in a kaihruai a, president M Baithai-in thu a sawi. Kum 2022-2024 chhunga hruaitu turte an thlang a, president atan M Baithai, vice president-ah V Pawhla leh treasurer atan Lalnunkima Pisa te an thlang.

MJA Siaha district inkhawmpui hian resolution an siam a, "MJA-in India ram state ṭhenkhatte anga journalists pension scheme nei ve tura hun rei tak a lo buaipui tawh Mizoram Journalists Pension Scheme tihpuitlin a ni dawn ta hi MJA, Siaha chuan ropui a tiin lawmawm a ti tak zet a ni," an ti.