Nurse hotute pual training khâr

Mizoram Nursing Council (MNC) chuan sorkar laipuia Ministry of Health & Family Welfare bul tumin February 1-4, 2022 chhung khan nurse lama hotute pualin training an buatsaih a, nimin khan khârna inkhawm hman niin, HFW Board vice chairman Dr ZR Thiamsanga, MLA-in a hmanpui.

Training hi Mizorama nurse zirna-ina principal-te leh damdawi-ina nursing superintendent-te tana buatsaih a ni a; Dr ZR Thiamsanga chuan, nursing institution-a principal leh nursing superintendent-te chu nurse ṭha leh rintlak chher chhuak zel turin ṭhahnemngai taka ṭan la tur leh inpekna thûk zawk nen ram leh hnam tana theihtawp chhuaha thawk turin a fuih.

Dr ZR Thiamsanga chuan, nurse hna chu Pathian rawngbawlna pawimawh tak a ni tih sawiin, "Damlote chungah ṭawngkam zaidam, hmangaihna leh taimakna lantir chunga thawh reng a ṭul a, Mizo nurse-te hi India ram mai bakah khawvelah pawh an duai lo hle. Mizorama nurse-te Covid-19 donaa an inpekna a fakawm hle a ni," a ti.