MSCI building thar hawn a ni

Mizoram State Cancer Institute (MSCI), Zemabawkah nimin khan World Cancer Day hman a ni a, khuallian Health minister Dr R Lalthangliana'n MSCI building thar a hawng.

Minister chuan, National Cancer Registry Programme-in report a tihchhuahah Mizoramah kum tin cancer vei thar 1,600 vel hmuh belh ṭhin a nih thu a sawi.

Dr R Lalthangliana chuan, Mizoramin ziak leh chhiar thiam tam lamah leh kawng hrang hrangah chanchin ngaih­nawm tak tak a nei ṭhin tih sawiin, "Hetih lai hian, cancer vei kan tam lutuk erawh a pawi hle. National Cancer Registry Programme-in report a tihchhuah ṭhinah Mizoramah hian kum tin cancer vei thar mi 1,600 vel hmuh chhuah ṭhin a ni tih tarlan a ni," a ti.

Cancer veite enkawlna lian leh changtlung zawk, cheng vbc. 500 sênna tur Cancer Superspeciality Hospital din tum a nih dan sawiin R Lalthangliana chuan, "Hna bul ṭan thuai a nih theih nan sorkar laipuia ministry hrang hrangah technical committee khirhkhân tak tak paltlang a ni tawh," a ti a; Mizoramin hmasawnna ruhrel leh bungraw ṭha lei kawngah hmasawn viau mah se, thawktu ṭha, mithiam, superspecialist, clinical leh academic-a thiamna sang filawr tak tak nei a mamawh thu a sawi.

MSCI building thar hi Tertiary Care Cancer Centre project niin, sorkar laipuia National Programme for Prevention and Control of Cancer, Diabetes, Cardiovascular Diseases and Stroke programme hnuaia awm a ni a; kum 2014-ah project thehluh a ni. Central inspection team-in March 2014-ah a hmunhma an endik hnuah December 2015 khan a sakna tur cheng vbc. 44.27 pawm a ni.

Project-ah hian in sakna tur leh hmanraw chi hrang hrang leina tur a tel a; Cancer Hospital building sakna turin cheng vbc. 8.8 ruahman a ni a, bungraw chi hrang hrang 25 lei niin, chu'ng zinga 23 chu Mizoramah thlen a ni tawh.

In hi September 18, 2020 khan sak ṭan a ni a, CB Engineers-in an sa a ni. Ward pahnih a awm a, ward khatah khum 16 awmin, a vaiin khum 32 a awm a, OPD panga a awm bawk. Kumina World Cancer Day thupui chu 'Close the care gap' tih a ni a; inkhawmah hian Health & Family Welfare Board vice chairman Dr ZR Thiamsanga, Aizawl mayor Lalrinenga Sailo leh deputy mayor R Thanglura, Health secretary R Lalramnghaka, NHM mission director Dr Eric Zomawia bakah sorkar hotu dangte an tel.