Hmuhphiah seng turin inbe rem

Kolasib DC Dr H Lalthlangliana leh Mamit DC H Lalnunhlua te chuan nimin khan Bairabi-ah Hailakandi DC SK Jha an kâwm a, ramri bula hmunphiah chíngtu Mizoram leh Assam-a mite'n hmunphiah an seng phal ni se, an ti.

Thu dawn danin, Mizoram leh Assam ramria hmunphiah chíngtute harsatna sukiang turin Mizoram sorkarin a theih ang angin hma a la a; February 3, Ningania Mizoram leh Assam home minister-te video conference hmanga an inbiakna bawhzuiin DC-te chu nimin khan an inbia a ni.

DC-te chuan, state pahniha hmunphiah chingtute harsatna insiamsak tawn loin, an huam chhungah SDO (C) leh police-te'n hmunphiah an seng theih dan tur enpui se, an ti. Assam mi Mizorama hmunphiah huan nei mi paruk leh Aitlanga Assam police awmna lai vela Mizoram mi hmunphiah huan nei seng thei lo chhungkaw pathum an awm tih an sawi bawk.