NE bial tan sipai battalion dah aiin Hindi zirtirtu dah a pawimawh zawk - MP Vena

Rajya Sabha MP K Vanlalvena chuan nimin khan Parliament budget session-ah thu sawiin, "Hmarchhak bial tan Hindi zirtirtu dah hi sipai battalion dah aiin a pawimawh zawk a ni," a ti.

K Vanlalvena hian nimin khan Parliament session zero hour-ah Mizorama Hindi zirtirtute dinhmun leh hmarchhak biala Hindi zirtirtute mamawhna leh an dinhmun siamṭhat a pawimawh thu a sawi a ni.

Rajya Sabha MP chuan, hnam inpumkhatna atan hmarchhak bial naupangte'n Hindi an thiam a pawimawh thu sawiin, "Hmarchhak bial mite chu a tlangpuiin Mongolian thlah, nu leh pa aṭanga Hindi hmang lo an ni a, state danga Hindi hmangte angin an nu leh pate aṭangin Hindi zirna tur an nei ve lo a, hmarchhak bial tana Hindi zirtirtu dah hi sipai battalion dah aiin a pawimawh zawk a ni," a ti.

K Vanlalvena chuan, Mizoramah Hindi zirtirtu high school-ah mi 384 leh middle school-ah mi 724 awm sate bakah, Samagra Shiksha hnuaiah mi 855 lâk a nih thu a sawi a, chu chuan sorkar sikul leh sorkar ṭanpui (govt aided)-te mamawh a phuhrûk theih rualin, hmarchhak bial pum huapin zirna bulṭhut primary school-te tun thlengin Hindi zirtirtu pek an la nih loh thu a sawi.

Rajya Sabha MP K Vanlalvena chuan, Samagra Siksha hnuaia sum hmanna tur ṭhenkhat, zirtirtute leh educator-te hlawh atana sum sên tur chu kum tin tih tlem tial tial turin ruahman thar siam a nih thu sawiin, "Hei hi state sorkar tan phurrit belhchhahna a nih avangin state tênau zawk, hmarchhak bial state-te ang tan chuan Samagra Shiksha component tinah central sorkar leh state sorkar sum intum sem tur hi a pangngai anga 90:10-a la kalpui chhunzawm tura siam ṭhat ni se," a ti.

K Vanlalvena chuan, "Samagra Siksha hnuaia Hindi zirtirtute chu state sorkar hnuaia zirtirtu dangte lâk dan nen rualkhai taka kalpui ni se, zirna ṭha neih nan thil pawimawh a ni," a ti a; Samagra Sikhsha zirtirtute'n hlawh ṭha zawk an neih theih nan sum tam zawk ruahman a ṭul thu a sawi.

Rajya Sabha MP chuan, sikul hrang hrangah Hindi zirtirtute chu muster roll-a chhawr deuh vek an nih avangin zirtirtu dangte nen an dinhmun a inthlau tih sawiin, "Hei hian Hindi ngaih pawimawh lohna a hring thei dawn a ni," a ti a; hmarchhak bial mite leh India ram hmun danga mite inkarah inremna leh inpumkhatna ṭha zawk a awm theih nan hmarchhak biala Hindi zirtirtu mamawhna chu sorkar laipuiin a ngaih pawimawh a ṭul thu a sawi a ni.