ASHA volunteer-te an châwl zui zel ; RUSA leh NHM-a thawkte'n hlawh an la ṭha lo

Accredited Social Health Activist (ASHA) volunteer-te chuan hun rei tak chhung an thawh lawmman (incentive) an dawn tawh loh avanga February 1, 2022 aṭanga hna an chawlhsan chu an la chhunzawm zel. RUSA hnuaia thawkte'n thla kaw chhung leh NHM hnuaia thawkte'n thla hnih hlawh an la lo.

ASHA pawl hruaitute chuan, Mizorama ASHA volunteer 1,091-te'n National Health Mission (NHM) hnuaia scheme hrang hranga hna an thawhnaah hun rei tak chhung lawmman an dawng tawh lo tih an sawi a, "Hun rei tak lawmman kan dawn tawh loh avangin February 1, 2022 aṭang khan hna kan chawlhsan a, lawmman kan hmuh kim hma chuan kan châwl dawn a, engtia rei nge ni dawn tih hriat a ni lo," an ti.

Lungawi lohna an lantir hmain an harsatna chungchangah sorkar hotute an dàwr tih sawiin ASHA pawl hruaitute chuan, "Health Minister, NHM Mission Director leh mahni district ṭheuha chief medical officer-te kan hmu vek a ni," an ti a; an chawlh hnuah NHM Mission Director nen inkawm tum mah se, pawl hruaitute zingah Covid-19 positive an awm nual avangin an la inkâwm lo tih an sawi.

ASHA volunteer-te chuan, hna an chawlhsan rih avangin Mizoram khua leh veng hrang hranga ASHA hmang ṭangkai ṭhintu mipui hriatthiamna an ngen a; an thawh lawmman an la dawn kim lohte a rang lama pe turin Mizoram sorkar an ngen bawk.

NHM Employees Union, Mizoram (NEUM) hruaitute chuan zawhna chhángin, nimin thleng khan December 2021 leh January 2022 hlawh an la la lo tih an sawi.

NEUM hruaitute chuan, hlawh chungchanga an file khawihtuin Covid-19 a vei ve avangin hmalak chak theih a nih loh thu sawiin, "Nimin (Ningani) khan kan naute'n an inah an pan chilh a, file a kal rei phah deuh," an ti a; an dinhmun chungchang chu pâwlin an ngaihtuah ṭêp tawh a rinawm thu an sawi bawk.

NEUM hian December 17-20, 2021 chhung khan sorkara an phût hrang hrangte avangin chawlh an lo la tawh a, chumi ṭuma sorkar hotute nen an indawrnaah sorkar hotute chuan regular taka hlawh pek an nih tur thu an hrilh a ni.

Rashtriya Uchchatar Shiksha Abhiyan (RUSA) hnuaia thawkte'n hlawh an lâk hnuhnun ber chu April 2021 thla hlawh a ni a, May 2021 leh a hnu lam zawnga hlawh tun thlengin an la la lo. RUSA hnuaia thawkte harsatna tawh chungchang hi Higher & Technical Education minister Dr R Lalthangliana chuan February 2, 2022-a RUSA hnuaia sak building a hawnnaah a sawi a, "MHRD-in RUSA an kalpui dan a muangcháng a, kan thiam loh ni loin anmahni lamah zawk fel lo a awm avangin kawng ṭhenkhatah kan duh angin kan kal chak thei lo a ni," a ti.

Hetih lai hian, Mizoram sorkara a ngheta thawkte chuan January 2022 hlawh an la tawh thung a, group A officer-te pawhin February 2, 2022 khan January thla hlawh an la a ni.