KHAWTHLIR

YMA-in sem dawn
Central YMA office bearer-te nimina ṭhukhawm chuan, Covid-19 hripuiin a luhchilh nasat zual khuate ṭanpuina tura CYMA leh Aizawla YMA branch-te thawh khawm aṭangin Rs 4,75,000 sem an rel. YMA sub-headquarters pariat hnenah Rs 50,000 ṭheuh leh group panga hnenah Rs 15,000 pek turin an ruahman a ni.

Mi 7,96,566-in Vaccine la tawh
Mizoramah February 3, Ningani thleng khan mi 7,96,566 hnenah Covid-19 vaccine dose 14,32,071 pek a ni tawh. Ningani khan Mizoramah Covid vaccine dose 1,030 pek a ni a, dose khatna 543, dose hnihna 316 leh precautionary dose 171 a ni. Covid-19 vaccine la tawh zawng zawng chu mi 7,96,566 an ni a, chu'ng zinga mi 6,16,312 chuan dose hnihna an la tawh a, mi 19,193-in precautionary dose an la tawh bawk.

Tanpuina hlân
AMC Ward-III councillor C Lalchhandami chuan nimin khan Lengpui Branch YMA hnenah Covid-19 dona hmanraw chi hrang hrang - oxygen concentrator, infrarred thermometer, oxygen mask, hmai khuhna leh hmai tuamna eng emaw zat a hlân a; Covid-19 dona atana ṭanpuina a pek thawh 22-na a ni.

NMBA sawiho
State Level Committee on Nasha Mukt Bharat Abhiyaan chu Social Welfare secretary Sangchin Chinzah hoin nimin khan Secretriat conference hall-ah an ṭhukhawm a, hmalakna leh hmachhawpte an sawiho. NMBA hi ṭhalai ruihhlo la ti lote venhim leh ruihhlo khawih ṭhinte chhanchhuah a, nunphung pangngaia an nun leh theihna atana ṭanpuina tura duan a ni a, Aizawl, Champhai leh Kolasib district-ah kalpui mek a ni.

Cake ur zirna
Mizoram Youth Commission (MYC)-in Livelihood Generation for Returned Migrants Workers due to Pandemic Outbreak Covid-19, NEC Phase-II kaltlanga cake ur zirna a buatsaih chu nimin khan MYC training hall-ah khâr a ni a, MYC secretary Donny Lalruatsanga'n a hmanpui. Cake siam zir zo mi 20 hnenah cake siamna hmanraw chi hrang 18 pek a ni.