Red zone-ah inkhawm phal a ni lo

Mizoram State Disaster Manage­ment Authority hnuaia State Executive Committee chairman Dr Renu Sharma, chief secretary chuan nimin khan Mizoram pum leh Aizawl khawpui bika Covid-19 kaihhnawiha khawsak dan tur inkaihhruaina a tichhuak a; red zone-ah inkhawm phal a ni lo.

SEC Chairman chuan, Mizo­rama Covid-19 lêng dinhmun thlirin, nasa takin hripui a darh bakah positivity rate a sang hle tih a hriat avangin Mizoram chhungah Covid-19 hri pangngai bakah Omicron darh zel tur vên nan inkhuahkhirhna nasa zawk siam turin thuneitute ráwn chungin thutlukna an siam tih a tarlang. Inkaihhruaina hi thu dang a awm hma chu hman tur a ni.

Inkaihhruaina tharah hian, red zone-ah sakhaw thila punkhawm (inkhawm) phal a ni lo a, red zone ni loah chuan biak-ina leng zatve aia tam loin inkhawm phal a ni a, zaiho phal a ni lo.

Board exam tur ni lo tan online-a class kal chhunzawm tur a ni a; Mizoram pumah zan dar 9 aṭanga zing dar 4 inkarah curfew puan chhunzawm tur a ni. Covid-19 vaccine la lo zawng zawngte chu sorkarin a thlâwna vaccine lakna a ruahmanah a hma thei ang bera la tura ngen an ni.

Bazar leh dawrte chu red zone-ah chuan odd leh even dungzuiin ni tin hawn chhâwk tur a ni a; DC-in task force leh dawrkai inzawmkhawm pawl hruaitute ráwn chungin dawr hawn dan tur ruahmanna a siam ang a, Aizawl New Market huam chhung bikah chuan Commerce & Industries Secretary-in ruahmanna a siam ang.

Aizawl páwn lamah chuan DC-te'n an district dinhmun azirin inkaihhruaina an siam dawn a; Health department-in January 31, 2022-a inkaihhruaina a chhuah chu khauh taka kengkawh turin DC-te hriattir an ni.

Aizawla inkaihhruaina ṭhenkhat
1) Loh theih loh thilah lo chuan páwna chhuah loh tur, inlènpawh loh tur.
2) HSLC leh HSSLC exam turte tan sikul leh hostel hawn phal a ni a, sikula thawkte'n vaccine full dose lâk vek tur.
3) Training institute-ah a zatvea kal phal a ni.
4) Board exam, recruitment exam, adt. thupêk zawm chungin phal.
5) Inneih leh mitthi vui inkhawmah a hmuna leng zat zatvein phal a ni a, ei leh in sem phal a ni lo.
6) Sports practice/tournament, picnic spot, movie theatre, park, swimming pool, sahuan, gym, spa, beauty parlour leh a huhoa páwna chhuah phal loh.
7) Restaurant-te home delivery leh takeaway chauh phal a ni.
8) Zing/tlai walk leh cycle hmanga insawizawi phal a ni.
9) Lu mehna dawr hawn phal a ni.
10) Mipui punkhawm phal a ni lo a, national/state level-a pawimawh bikah sorkar phalna lain a theih thung.
11) Hna thawh phal a ni.
12) Lirthei intlàn chhâwk ṭhin dan pangngai anga kalpui tur.