Taxation-in chhiah an lâkna kuhva rahte Burma aṭanga lut a nih leh nih loh an hre lo ; Taxation Minister-in khawchhak kuhvaah GST 5% lâk a nih thu a sawi

Mizoram sorkarin kuhva rah ro aṭangin chhiah, Goods and Services Tax (GST) 5% a la ṭhin a, chhiah a lakna kuhva rahte chu Mizorama thar emaw, Myanmar aṭanga lâk luh emaw a nih leh nih loh an hriat loh avangin Myanmar aṭanga kuhva rah lâk luhah chhiah lak a nih leh nih loh leh chhiah lak zat (amount) an hre lo.

Hetih lai hian, Taxation minister Lalcham­liana chuan, khawchhak aṭanga Mizoram kaltlanga kuhva rawn lut aṭangin Mizoram sorkarin chhiah a lâk thu leh chhiah (GST) lak zat chu 5% a nih thu, February 2021-a Assembly budget session-ah a sawi thung.

RTI Act hmanga Taxation department-in ram dang aṭanga Mizorama kuhva lak luhah chhiah a lak leh lak loh zawhna chhangin Taxation department SPIO chuan, Mizoram GST Act, 2017-in a sawi angin ram dang bungrua leh India ram bungrua thliar hran a ni lo a, chhiah lakna leh lak lohna bungrua chauh sawi a nih thu a tarlang.

Mizoram Taxation department-in ram dang (Myanmar) aṭanga Mizorama kuhva (areca nut) lak luhah chhiah a hranpain a la ngai lo tih tarlangin Taxation SPIO chuan, "Voluntary-a online aṭanga an lo pek a awm a nih chuan kuhva rah aṭanga chhiah lut chu a awm ngei ang. Amaherawhchu, GST Act hnuaia kuhva aṭanga chhiah kan hmuh hi ram dang (Myanmar) aṭanga Mizorama kuhva lak luh aṭanga chhiah lo lut a nih leh nih loh kan hre thei lo," a ti.

Taxation SPIO tarlan danin, April 1, 2005 aṭangin Mizoram Value Added Tax Act, 2005 hnuaiah kuhva rah ro (dried areca nut)-ah chhiah 4% lak a ni a, July 1, 2017 aṭangin GST Act hnuaiah India ram pumah kuhva rah ro-ah chhiah 5% lak a ni thung.

Myanmar aṭanga Mizorama kuhva rah lak luhah kum 2015-16 aṭanga kum 2021-22 thlenga Taxation department-in chhiah a lak zat leh chhiah lakna kuhva zat zawh a ni a; SPIO chuan, kuhva aṭanga chhiah an hmuh chu Myanmar aṭanga lak luh a nih leh nih loh an hre thei lo tih tarlangin, "Chhiah petute rêng rêng hian GSTR3B (Return of Turnovers) an file hian bungraw mal hminghmerhin an ziak lo a, chuvangin, kuhva a ni emaw, bungraw dang a ni emaw, sumdawngte'n bungraw mala an chhiah pek zat leh tam lam (quantity) a hriat theih loh," an ti.

Taxation SPIO chuan, "GST hi 100% online a nih vangin online-in chhiah lut chu en a ngai a. Mahse, software siam tura GST Council-in mawhphurhna a pek GST Network (GSTN) hian GST lut zat hi item wise-a enna tur a la siam loh vangin eng bungruaah nge tax pek a nih a, eng zat nge chu bungrua aṭang chuan tax an pek tih a hriat theih loh a ni," a ti bawk.

Hetih lai hian, Taxation minister Lalcham­liana chuan February 2021-a Assembly session-ah Zodintluanga Ralte zawhna chhangin, khawchhak aṭanga Mizoram kaltlanga kuhva lut aṭangin Mizoram sorkarin chhiah a lak thu a sawi a; chhiah lakna rate chu kuhva bag aṭanga chhût theih a ni lo tih sawiin, "Tunah hian kg. khat Rs. 40-a hralh angin sumdawngte hnenah hian kuhva roa GST rate chu 5% a ni," a ti.

Taxation minister chuan, "Kuhva rau rau hi smuggling goods a ni lo a, a thiang a ni. Mahse, ram dang aṭanga rawn lâk luh a nih kha chuan illegal goods a lo ni ta a, tun hnai thleng khan Burma aṭangin a lo lut reng tih kan hria a. Chuvang chuan meeting-ah uluk takin kan sawi a, hei hi India sorkarin vawi thum vawi li lai lehkha thawna lo titawp rawh u tia min rawn request-na a awm bawk si a, chuvang chuan a titawp tur zawngin hma lak a ngai a nih hi kan ti," a ti bawk.