PM-DevINE su chhuaktu kan nihna a awm mai àwm mang e kan ti - CM

Chief minister Zoramthanga chuan, sorlar laipuiin India hmarchhak state-te a bika enkawlna tur a duan thar Prime Minister’s Development Initiative for Northeast (PM-DevINE) chu Mizoram aṭanga an zuk sut chhuah a nihna a awm theih thu a sawi.

Nimina thuthar thehdarhtute CMO Cabinet Room-a a kawmnaah Zoramthanga chuan, nikum November-December chhunga Prime Minister, Union Finance Minister leh Finance Secretary-te a kawmnaa a au hla ber chu bamboo link road a nih thu a sawi a, "Mithiamte'n Mizoramah mau metric ton maktaduai 20 vel lak tur a awm thu sawiin, chu'ngte la tur chuan bamboo link road siam a ngaih thu ka hrilh a ni," a ti.

Chief Minister chuan, sorkar laipui hotute hnenah Mizorama mau kawng kam leh kiua put phâkte chu lâk zawh a nih tawh avang leh raw material awm loh avangin industry-te pawh khâr a nih thu a hrilh tih sawiin, "Tuna maute chu a puta put chhuah dawn chuan a to dawn lutuk a, kawng siam a ngai a ni," a ti a, kawng siamna atana pawisa pe turin sorkar laipui hotute nasa taka a kar thu a sawi.

Bamboo link road atan central budget-ah dahna tur a awm lo tih sawiin CM Zorama chuan, "Tu ministry-ah emaw dah loin, DoNER emaw NEC enkawl tura ti mai turin ka hrilh. Chuvangin, PM DevINE hi a zu su chhuaktu nihna a awm mai àwm mang e kan ti. Tun Chawlhni mai pawh kan Union Finance Minister pawh telephone hmangin ka la nawr a ni," a ti.

Zoramthanga chuan, PM-DevINE hnuaia a bul ṭanna atana sum dah cheng vbc. 1,500 aṭangin hmun thuma ṭhena hmun khat aia tam cheng vbc. 600 chu Mizoramin a chan thu sawiin, "State dang chuan Mizoram ang state tê reuh tê in pe hnem lutuk bik an ti mai àwm mang e," a ti a, PM-DevINE aṭangin project a zirin sum hai chhuah zel theih a la nih thu a sawi.

Chief Minister sawi danin, bamboo link road atana sum hmuh cheng vbc. 100 chu pilot project tura tih a nih angin, sorkar laipuiin awlsam zawka an lo enfiah theihna tur Aizawl khawpui bul hnai lui ruam rem ṭhaahte hman phawt a ni dawn. Bamboo link road atan cheng vbc. 500 hû detailed project report thehluh leh tawh a nih bakah, a dang pawh thehluh leh tum a ni.

Union budget chu fak tlak nia a hriat thu sawiin Zoramthanga chuan, "Ka hmuh phak chinah chuan development leh mipui oriented (tinzawn) tak tak niin ka hria. Covid-19 karah hetiang budget pharh theih a ni hi a ropui ka ti," a ti.

Tarlan tawh angin, union budget pharh tâkah khan PM-DevINE hnuaiah 'Aizawl by-pass road on western side' atan cheng vbc.500 dah a ni a; Mizoram hmun hrang hranga bamboo link road siamna tur 'Pilot project for construction of bamboo link road at different locations in various districts in the state of Mizoram' hnuaiah cheng vbc. 100 dah a ni bawk.