BSF-in thil awm dan sawifiah

Border Security Force (BSF) Mizoram & Chachar Frontier-a Public Relations Officer (PRO) chuan thuchhuah siamin, Tablabagh-a BSF border out post (BOP) ṭhutchilhtu assistant commandant Anil Nair chungchanga Tablabagh leh Tlabunga pawl ṭhenkhatte thu puanzar chu thu dik lo a nih thu a tarlang.

BSF PRO thuchhuah chuan, Anil Kumar-a, ramri bula awmte leh sorkar hnathawkte laka mawi lo taka che anga puhna chu thu dik lo a nih thu sawiin, "Tihhmingchhiat tumna leh mi tute emaw mahni hmasial taka politics bawlhhlawh tak khel ṭhinte'n an hruai sual tumna niin a lang," a ti a; Anil Nair chuan fak tlaka hna a thawh ṭhin thu a sawi.

BSF PRO chuan, Anil Nair chuan Tablabagh BOP chu August 9, 2018-ah a zawm chauh thu sawiin, rei tak awm tawh anga sawi chu thu dik lo a nih thu a sawi a, "Hun rei lote chhungin dan loa sumdawnna a titawp a, mipui nen thawhhona ṭha tak a siam a. Bangladesh lama misualte nena Karnaphuli lui kal­tlanga dan loa sumdawnna awm mek a titawp a, thla hnih chhungin BSF-te'n Karnaphuli luia tawlh rûk teak tum 971, Rs. 12,71,565 man an man a ni," a ti.

Tarlan tawh angin, Tablabagh khawtlang hruaitute leh Tlabunga pawl ṭhenkhat hruai­tute September 18, 2018-a Tlabung YMA Rûna ṭhukhawm chuan, Anil Nair (Nayak tiin an ziak) chu rang taka sawn chhuah an phût thu an lo tarlang tawh. Anil Nair chu ramria mipuite nun tirálmuang lo-ah leh uniform inbel loa hnehsawh leh chaldelh taka mi a ṭawng khum ṭhinah an puh a ni.