Khelh fuh tum leh khelh dik tum kan inbei dawn - Lalduhoma

Ṭangrual pawl, Zoram People’s Movement (ZPM) chief ministerial candidate Lalduhoma chuan, kumina Mizoram Assembly inthlanpui awm turah politics khelh fuh tum leh khelh dik tumte an inbei dawn tih a sawi.

Nimina ZPM pisaa inkhawm­ah Lalduhoma chuan, kum 30 chuang Mizorama sorkar ding tawh leh ding mekte'n an ngaih pawimawh ber chu vote a nih ang­in, NLUP-ah cheng vbc. 2800 dah a nih thu a sawi a, "50% aia tam department hrang hranga mi an pawt péng a, development aiin vote zawn tinzawnin an hmang a ni. Cheng vbc. 2800 an sên tawh hnu hian development hmel hmuh tur a la awm lo, a vanduaithlak hle. Kan hma inthlan lo awm turah hian vote zawng party leh ram siamṭhat duhtute kan inbei dawn a ni," a ti.

Lalduhoma chuan, Congress party-in cheng nuai khat an tiam a, MNF party-in cheng nuai thum an tiam thung tih sawiin, "Sorkar leh vote zawn ringawt an âtchilh a, mipui min lilam chhan a. SEDP certificate siamin vote zawn nan an hmang a, an sorkar huna cheng nuai thum thleng an tiam ṭhin," a ti a; tlin ringawt mai buaipuitute nena an inbei tur chu phurawm a tih thu a sawi.

Congress sorkar chu mipuiin an paih tawh dawn nia sawiin Duhoma chuan, "Sorkar tawh reng reng hi an term khatnaah chuan an thawk ṭha em em vek a, an term hnihnaah an fing tual tual a, rem an hre tual tual a, experience an ngah tual tual a, an laktlak loh tual tual thung; an term hmasa an tluk ngai lo. Chuvang­in, Congress sorkar hi mipui­in paih an duh tawh a ni," a ti.

Lalduhoma chuan, Assembly inthlanpui awm awm turah ZPM chu mipui innghahna awmchhun a nih thu a sawi a; MNF MLA ding lai zingah inthlan hmasaa an thawhpui MPC vote tel loa tlin theih tur an awm loh thu a sawi bawk.