District inrêlbàwlna thuam chak tum a ni - Chief Minister

Mizorama district leh civil sub-division inrêl­bâwlna tihchangtlunna atan nimin khan Secretariat Annexe conference hall-ah 'Conference of District Commissioners and Supe­rintendents of Police' buatsaih a ni a; khuallian Lal Thanhawla, chief minister chuan, district inrêlbâwlna thuam chak a tum thu a sawi.

Chief Minister chuan, Mizoramin mahni hnaa tui leh ṭhahnemngai tak tak district hotu officer naupang tak tak a nei chu lawmawm a tih thu a sawi a, "Mizoram sorkar chuan district inrêlbâwlna thuam chak turin kawng hrang hrangah hmalakna a nei mek a, mawhphurhna sang zawk inpek pawh ṭul," a ti.

Hriselna, zirna, inkalpawhna leh mi harsate chhawmdawlnaa hmalaknate ngaih pawimawh lehzual a duh thu sawiin CM Hawla chuan, "Sorkar scheme-te hi mipui tana hriat awlsam leh awlai thei ang bera kalpui ṭhin ni se," a ti a; Mizoram chu leiminte a tam ṭhin avangin disaster management lamah pawh DC leh SP-te mawhphurhna a tam ṭhin thu a sawi.

Lal Thanhawla chuan, Mizoram chu ram dang pahnih nen inṭhenawm a nih avangin ruih theih thil, rálthuam leh danin a phal loh thil tam tak tawlh rûkna kalkawng a nih thu sawiin, "Border district-a awmte mawhphurhna a sang zual. Sorkar pawhin kawng hrang hrangah chak taka hma a la zel a, dan leh thupek kenkawh kawngah SP-te an pawimawh hle," a ti.

Home minister R Lalzirliana chuan, Mizoram chu state rálmuang leh nuam tak a nih thu sawiin, "Mizoram hian ram dang leh state dang nen ramri kan ngah avangin, pawi thei thil hrang hrang luhka pakhat a ni a, police lamin theihtawp an chhuah a ni," a ti a; DC leh SP conference chuan rah ṭha a chhuah ngei a beisei thu a sawi.

Finance minister Lalsawta pawhin thu sawiin, inrêlbâwlna fawng chelhtute chu an thawhpuite nen thawhhona ṭha an neih pawi­mawh a tih thu a sawi a, "District-a department ram ṭhenkhat awm âwlte chu ṭangkai zawka hman an nih theih nan chhinchhiah ni se a ṭhat ka ring. Right to Public Service Act kenkawhnaa DC leh SP-te'n an mawhphurhna hre reng se ka duh," a ti.

Land settlement chungchanga DC-te mawhphurhna chungchang sawitu Revenue minister R Romawia chuan, "Ram inchuh leh innêksakte a awm ṭhin hi a pawi a, hetiang harsatna awm ṭhinte hi sukiang turin sub-divisional officer-te hnenah mawhphurhna tam zawk pek a pawimawh," a ti a; DC-te chu head of office dangte nen inpawh leh inlungrual takin thawkho ṭhin se a duh thu a sawi.

Inkhawm hi chief secretary Arvind Ray-a'n a kaihruai a, GAD secretary Ashish Kundra chuan Mizorama district administration leh civil sub-division tihchakna atan hmalak ngaite a sawifiah.

DC leh SP-te intawhkhawmna hian ni hnih awh tur a ni a; ram chhung venghimna chungchang, ILP, ramri chungchang, district magistrate leh police inkara thawh­hona ṭha neih leh sorkar laipui prog­ramme kalpuinaa DC-te mawh­phurhnate sawiho a ni.