KHAWTHLIR

Helipad hawng
East Lungdar tlánga helipad thar chu nimin khan bialtu MLA Vanlalawmpuii Chawngthu, minister-in a hawng. Minister chuan, a bial chhunga helicopter service a awm thei dawn ta chu lawmawm a tih thu sawiin, "Helicopter hi mipuite'n hmang chur chur kher lo mah ila, damloh nikhua te, official thil pawimawhahte leh rîkrum thilahte a ṭangkai em em a ni," a ti. Thawhṭanni apiangin E. Lungdar leh Aizawl inkarah helicopter a service dawn a, mi pakhat chuan man chu Rs. 2,500 a ni ang.

Thisen pe
Rulchawm Branch YMA chuan nimin khan an YMA Hall-ah blood donation camp an huaihawt a, an member mipa 47 leh hmeichhia 19-te'n Aizawl Civil Hospital tan thisen unit 66 an pe.

MLA-in hawng
Champhai District Badminton Association (CDBA) hmalaknaa Champhai Town Hall-a court mat phah thar chu nimin khan bialtu MLA TT Zothansanga'n a hawng. CDBA hian MLA dund Rs. 5,00,000 leh thawhlawm thawh khawm aṭanga sum an hmuh hmangin badminton court cheibawl hna an thawk a, court mat pathum leiin, Rs. 3,80,000 an sêng a ni.

Filling station thar
Bharat Petroleum Cooperation Ltd.-in Champhai Zote-a filling station (petrol pump) an siam thar RC Champhai Filling Station chu nimin khan Champhai SDO Abraham Beirazi Khithie-in a hawng. RC Champhai Filling Station aṭang hian August 20, 2018 aṭang khan petrol leh diesel hralh chhuah ṭan a ni.

EVM hman dan zirtir
Nimin khan Aizawl DC conference hall-ah assistant returning officer (ARO) leh block development officer (BDO) te mobile van hmanga Election Awareness Campaign nei dan tur leh EVM leh VVPAT hman dan zirtir an ni. ARO 14 leh BDO 5 te hian nimin tlai aṭang hian Aizawl district-a polling station tlawhin, hmun lun laiah mipuiin EVM leh VVPAT an hman theihna turah mobile van an dinpui. Inkhawmah hian Systematic Voters’ Education & Electoral Participation chuan Aizawl vistrict chhunga Vohbikte Icon atan R Vanrammawii, Armed Veng an ruat thu tarlan a ni.