Congress party-in lungawi lohna an lantir

Congress party chuan All India Congress Committee (AICC) rua­­hman angin nimin khan India ram state hrang hrangah sorkar laipui, BJP kaihhruaiin petrol, diesel leh gas man an tisang lutuk duh lohna, Bharat Bandh an huaihawt a; Bharat Bandh pual hian Aizawlah pawh Vanapa Hall kawtah hun an hmang.

Lungawi loh lantirna hi Bharat Bandh tih a nih angin, state dang

ṭhenkhatah chuan bandh huaihawt a ni. Mizoramah erawh chuan bandh huaihawt a remchang loa an ngaih avangin Mizoram Pradesh Congress Committee (MPCC) chuan Vanapa Hall kawtah sit-in de­monstration an nei a; AICC representative Pradyut Bordoloi, Assam Pradesh Congress Commi­ttee vice president ni bawkin a hmanpui.

Assam sorkara minister hlui Pradyut Bordoloi hian nimin vek khan Aizawl Press Club-ah thuthar thehdarhrtute a kâwm nghal a; BJP kaihhruai NDA sorkarah nasa takin petrol, diesel leh eirawngbawlna gas man a san thu te, BJP sorkarah India pawisa hlutna a tlakhniam thu te, BJP chu Hindutva kalpuitu an nih avangin Mizo mipuite an fimkhur a ngaih thute a sawi.

Pradyut Bordoloi sawi danin, Congress party kaihhruai UPA sorkar lai, March 2014-a international market-a tuialhthei thlitfim loh (crude oil) man chu US dollar 107 a ni a, chuti chung chuan UPA sorkar chuan petrol litre khat Rs. 70-in an hralh a ni. Tunah hian international market-ah crude oil chu US dollar 70 vel man a ni mek a, chutih laiin, BJP kaihhruai NDA sorkar chuan India ramah petrol litre khat Rs. 80 aia hniam loin a hralh mek a ni.

Pradyut Bordoloi chuan, eirawngbawlna gas man pawh kum 2014-ah chuan domestic cylinder pakhat Rs. 380-te a nih laiin, tunah chuan Rs. 960-te a ni ta tih a sawi a, "BJP kaihhruai sorkar­in tuialhthei leh gas man an tisang nasa lutuk hi a lung­chhiatthlak tak zet a, tunah hian petrol man san lai ber kan thleng mek a ni. BJP sorkar hian a chhia leh ṭha hriatna a hloh ta vek niin a lang," a ti.

AICC Representative chuan, Narendra Modi kaihhruai sorkar chu thil chi hrang hrangah a hlawh­chham nia sawiin, "Pawisa tihthih (demonetisation)-in awmzia a nei lo. Tunah hian US dollar 1 leh India pawisa Rs. 72.30 a intluk mek a, tun hi India pawisa hlutna hniam lai ber a ni mek," a ti a; BJP kaihhruai sorkar chu an insawi ang an ni lo hle tih a sawi.

Pradyut Bordoloi chuan, BJP chu Hindu firfiak pawl RSS nena ṭang dun tlat an nih avangin Mizo mipuite bakah, Naga leh Khasi-te'n an duh lo a, chuti chung chuan regional party thawhpuiah neiin thuneihna chan tumin ṭan an la niin a sawi a, "BJP hian tualchhung mi ṭhenkhatte hmathehah an hmang a, regional party hmangin state-ah rorel an tum ṭhin. Mizorama BJP-te hmanrua chu MNF-te an ni," a ti.

AICC Representative chuan, BJP-in MNF hmangin Mizoramah Hindutva kalpui an tum nia sawiin, "Mizo mipuite an fimkhur a ngai hle a ni," a ti a; BJP kaihhruai NDA sorkarin hmarchhak state-te special category an nihna chu paih tuma hma an lak reng thu a sawi bawk.