KHAWTHLIR

School Education directorate-a thawkte chuan nimin khan Education Centre-ah an director Lalzarmawii hoin kum 2020 atan inhlan tharna hun an hmang a; Director-in sorkarah secretary hna a chelh dawn avangin thlahna hun an hmang nghal. Lalzarmawii chuan, thawktute chu mihringa innghat lo a, Pathianah innghat tura chahin, "Chutianga kan nun chuan kan ni tin nun leh hnaah Pathianin min ṭanpui zel dawn a ni. Mi dang tana malsawmna ni zel turin kum tharah hian rilru thar leh tih tak zet zetna nen kan hmaa tih tur awmte i thawk ang u," a ti.

Mizoram State Election Commission chu notification chhuahin, Mara Autonomous District Council hnuaia village council pangaa by-election neih hun atan January 31, 2020 ruat a nih thu a tarlang. Khaw pangaah hian thihna vang te, member bàn vang te, V/C ṭhiah vangte leh V/C thar din a nih vangtein seat 13-ah by-election neih tur a ni.

Nimin khan Siaha leh Lawngtlaiah kumina Republic Day hman dan tur an rêl. Siahaah chuan Republic Day Celebration Committee chuan Republic Day hi zing dar 8-ah Meisatla khelmuala hman an rél a, Pathianni a nih avagin tableu show leh At Home buatsaih loh ni se, an ti. Lawngtlaiah chuan CYLA Playground-ah hman an rêl a, kum dang angin parade contingent neih leh an rel a ni.

Pang Zirlai Pawl (PZP) chuan nimin khan Chamdurtlang khaw khelmuala pandal sak Saikhawpui Rûnah General Conference vawi 33-na an hmang a, nimin khan rorel inkhawm neih niin, kum 2020-21 chhunga PZP hmalakna tur hrang hrang an rel. Rorel hi PZP president Herbert Ramengmawia'n a kaihruai a ni. PZP conference thurel zingah - Aizawlah Pang Hostel neih a nih ngei theih nan chak leh zuala hmalak te, Vaṭhuampuiah RD Block dah a nih theih nan chak leh zuala hmalakte leh Vaṭhuampuiah higher secondary school dah a nih theih nan Mizoram sorkara thlente a tel.