ART lak theihna tur OST Centre hawng

Ruihhlo (drug)-a inchiu ṭhinte'n HIV natna an kai lohna tura hmalakna, Oral/Opioid Substitution Therapy (OST) damdawi pek chhuahna hmuna Anti Retroviral Therapy (ART) damdawi sem chhuah theihna tur chu nimin khan ṭan a ni a; Aizawl leh Champhaia OST Centre aṭangin ART damdawi pek chhuah a ni tawh dawn.

Co-located ART and OST Centre hawnna inkhawm hi nimin khan Witestone Conference Centre, Ramhlun-ah neih a ni a; khuallian, MSACS project director Dr Lalmalsawmi Sailo chuan, OST la mek zingah ART damdawi la tura inziak lût mi 633 an awm mek tih a sawi.

Dr Lalmalsawmi Sailo chuan, ART damdawi la tura inziak lut tawh zinga eng emaw zat chuan damdawi la chhunzawm loin an tawpsan tih sawiin, "ART damdawi lak mamawhte'n tha taka an lak zat zat theih nan ART Centre-ah chauh ni loin, OST Centre-ahte pawh ART damdawi hi sem chhuah a ṭul tawh a ni," a ti.

MSACS tarlan danin, Co-located ART and OST Center hi enchhin nan Mission for Social Reforms (MSR)-in OST Centre enkawl laiah kalpui mek a ni a, OST la mek zinga mi 180 chu HIV hrik kai an ni a, ART damdawi ei mek mi 147 an awm.

Aizawl leh Champhaia OST Centre palia ART damdawi pek chhuah theihna turte chu - Aizawlah SHALOM leh SAMARITAN hmunahte leh Champhaiah CODNERC leh Genesaret Society-te centre-ahte a ni.

MSACS chhinchhiah danin, April 30, 2018 thleng khan Mizoramah ruihhloa inchiu ṭhin NGO hrang hranga inziak lut mi 8,590 an awm a, chung zinga 1,883 chu HIV positive niin, an zinga mi 1,306-in ART damdawi an la mek a ni.