Ni tin hmalam kan pan zel – ZPM

Zoram Peoples' Movement (ZPM) chuan thuchhhuah siamin, ZPM chu Zoram siamṭha tura mipui mangangte koh chhuah nia an inngaih thu an tarlang a, "Pathian malsawmna dawngin Zoram siamṭha turin ke kan pen zel a, mahni pawl dahṭhain, pawl pasarihte lungrual takin kan kal a, ni tin hmalam kan pan zel a ni," an ti.

ZPM chuan, innghahna lungphum nghet tak, Pathian an neih thu sawiin, "Pathian duh zawngin ke kan pên zel dawna, ram siamṭha turin ṭawngṭaina nen kan kal zel dawn. Movement a nih angin party leh pawl tih bik a awm lo," an ti a; ZPM-a tel zel turin mipui an sáwm.

Ram vei pawl dangte pawh ZPM-a tel turin an sáwm zel tih sawiin ZPM chuan, Zoramthar Pawl leh PRISM-te pawh ZPM-a tel turin ziaka sàwmna an pek tawh thu an sawi a, "An rawn tel ve ngei kan beisei reng a, thuthar erawh an nei thei rih lo niin kan hria. Mipui beisei anga ZPM-a luan za vek hi kan duh em em a ni," an ti.

ZPM chuan, ZPM-a tel pawl hrang hrangte chuan an pawl hming ṭheuh leh a hlutna awmte dahṭhain, ZPM hminga symbol pakhat hmanga inthlan chuh tura an inbuatsaih mek thu an sawi bawk.