MYC Chairman-in MEA hotute a kâwm

Mizoram Youth Commission (MYC) chairman Joseph Lalhimpuia, MLA chuan July 31, Thawhlehni khan New Delhi-ah Ministry of External Affairs (MEA) hotute a hmuin, Mizo ṭhalaite'n ram danga hna an thawh theih dan tur a sawipui a; sorkar laipui hriatpuia India ram páwna hna thawh tur ṭha leh him ngaihtuahpui turin a ngen.

Joseph Lalhimpuia hian MEA official-te–protector general of emigrants & joint secretary MC Luther, joint secretary (Consular, Passport & Visa Division) Amit Lungun leh joint secretary (GEM) Vanlalhuma te a hmu a ni.

MEA hotute chuan, The Emigration Act, 1983 hnuaiah Emigrate Project kalpui a ni a, state sorkar leh private company tan pawh MEA hnuaiah inziah luh theih a nih thu te, license 1,650 pek chhuah a nih tawh thu te, 2018 kum tir aṭangin graded project thar cheng nuai 8 MEA-ah pein, mi 100 tirh chhuah phalna license pek theih a nih thu leh thu chumi hnuaiah chuan license 109 pek a nih tawh thute an lo hrilh.

MYC Chairman hian nimin khan MYC-in a thawhpui mek Alternative Learning System (ALS) hotute Mizoram House-ah a kâwm bawk a; Mizo ṭhalaite tana ALS nen thawhhona ṭha tak kan neih avanga lawmawm a tih thu a sawi rualin, "Coaching kalpuia sum tam tak sen ringawt hi kan duhtâwk lo a, hlawhtlinna result kan hmu duh a ni," a ti.

MYC tarlan danin, MYC leh ALS thawhhonaa IAS coaching-a kal, UPSC preliminary exam-a tling mi 10 chin tan mains exam atana inbuatsaih turin ALS chuan New Delhi-ah an enkawl zui dawn a; mains exam-a tlingte pawh interview thlengin an enkawl dawn a ni. Mizorama IIT JEE & NEET coaching-a kal zinga a ti ṭha zual 25 chu ALS-in New Delhi-ah an enkawl zui dawn bawk