Mizoram upat zawng kum 1,400-1,500 World Heritage Site-ah Vangchhia puantir tum

Dr Sujeet Nayan chuan, Vangchhia mai bakah Mizoram khawchhak lam khua–Khawbung, Sazep, Samthang, Khankâwn, Khumtung, Vanzau, Ṭhekte, Vaphai, Zawlsei, Bungzung, Lianpui, Dungtlang, Lungphunlian leh Farkawn ramahte pawh lunga thil ker (manhir & petroglyph) eng emaw zat hmuh a nih thu a sawi bawk.

INTACH Mizoram Chapter convener P Rohmingthanga chuan, Vangchhia khaw rama thil hlui hmuh chhuahte chu ASI-in National Importance-ah a puan tawh thu sawiin, "UNESCO (United Nations Educational, Scientific and Cultural Organization)-in World Heritage Site-ah a puan theih nan hmalak kan tum," a ti.

Zawhna chhangin P Rohmingthanga chuan, World Heritage Site-a Vangchhia puan a nih theihna tur chuan tih tur a tam thu leh a kawng a thui thu a sawi a, "Sorkar leh ASI-te nen ṭha taka kan thawhho a ngai dawn a ni," a ti a; tunah hma an la ṭan dawn a, February 2019 velah thil pawimawhte an thehluh hman an beisei thu a sawi.

Kawtchhuah Ropui leh a chhehvela milem ker chi hrang hrangte chu Hindu pathian Ganesh leh Kalki nen inzawmna nei anga Daily News and Analysis (DNA)-in a tarlan chungchangah P Rohmingthanga chuan, "Hei hi thil dik lo a ni a, Vangchhia leh a chhehvela milem kerte leh pipute sûlhnute hi Hindu sakhua leh pathian nen inkungkaihna a nei lo," a ti.

INTACH Convener sawi danin, DNA-in Mizoram chhunga Genesh leh Kalki te lem a awm anga an tarlan chu hmanlaia Hindu lalram ni ṭhin, tun hnua Manipur lam hnaiha awm Suangpuilawn ram chhunga mi a ni a; Makara lem nia sawi pawh Assam lam hnaih, Kolalian bula Thirphunlian tlanga mi a ni.