Hriselna kawngah Mizoramin hma a sawn - Health Minister

2nd August, 2018

Health minister Lal Thanzara chuan, hriselnaah Mizoramin hma a sawn zel thu a sawi.

Nimin khan kum 2017-18 chhunga Mizoram sorkarin Reproductive, Maternal, Newborn, Child and Adolescent Health (RMNCHA) hmalakna a kalpui dan thlirletna leh Pradhan Mantri Surakshit Matritva Abhiyan (PMSMA) hnuaia nau pai en tam ber category-a hmarchhak state zinga tiṭha ber lawmman Mizoramin a dawn lawmna hun chu Tourist Lodge, Chaltlangah buatsaih a ni.

Khuallian, Lal Thanzara chuan, National Health Policy 2017 hnuaiah Mizoramin target a nei a, kum 2020-ah nu naupai lai leh nau chunga thi zat tehna, maternal mortality rate (MMR) chu 100-ah a tlahniam tur a nih thu a sawi a, "Nausen thihna, infant mortality rate (IMR) chu kum 2019-ah 28-ah, kum 5 hnuai lam thihna chu kum 2025-ah chuan 23-ah, Neonatal Mortality Rate chu kum 2025-ah 16-ah tla thla hman tura beisei kan ni," a ti.

Health Minister chuan, sorkarin mipui hriselna a ngaih pawimawh avangin district hospital zawng zawng leh MIMER, Falkawnah damlo enkawlna hmanraw changkang tam tak lei thar a nih thu sawiin, "Phai damdawi-in liana dam lo refer ngai zat pawh a tlem phah nasa hle a ni," a ti a; hriselna kawnga hmalakna hrang hrangah Mizoramin hma a sawn zel thu a sawi.

Nu nau paite hriselna enkawl kawnga hmalakna, PMSMA-ah naupai en tam ber huangah hmarchhak state zinga a ti ṭha ber lawmman Mizoramin a dawng chu a lawmawm a tih thu sawiin Lal Thanzara chuan, "Sorkara thawktu mai ni lo, private-a thawk obstetrician leh doctor eng emaw zat, nau paite en tura a thlâwna inpete chungah kan lawm hle," a ti.

Inkhawm hi NHM mission director Dr Lalrozama'n a kaihruai a, RCH special programme officer Dr Hmingthanmawii'n PMSMA Award chungchang a sawifiah.

Sorkar laipuia Ministry of Health & Family Welfare-in a buatsaih, ‘IPledgeFor9’ Achievers Award 2018' ah Mizoramin PMSMA Team Award a dawng a; June 29, 2018 khan Health department aiawhin NHM Mission Director leh RCH programme officer Dr Hmingthanmawii ten New Delhi-ah Union Health minister JP Nadda hnen aṭangin an dawng a ni.