KHAWTHLIR

Remsiami lawmpui
Sports minister Zodintluanga chuan, Women Hockey World Cup khelh mekah India leh Italy-in July 3 zana an inkhelh ṭuma Lalremsiami, Kolasib-in India tana goal a khung chu a lawmpui thu a sawi. Kolasib Sports Stadium-a Kolasib Constituency MLA Cup 2018 Football Tournament khârna, nimina neihah thu sawiin Zodintluanga chuan, Lalremsiami goal a khung hi Mizoram record-a chuang reng tawh tur a nih thu a sawi a, "A talent, inpekna leh discipline ṭhatna piah lamah, sorkarin a din Thenzawla Girls Hockey Academy-a an enkawlna rah a ni," a ti.

IES training
Mizoram Board of School Education chuan, nimin khan an conference hall-ah Aizawl district-a high school leh higher secondary school zirtirtute tan Integrated Evaluation Scheme (IES) software inzirtirna hun an buatsaih. Training-ah hian zirtirtu 60 an tel a, vawiinah chhunzawma zawh a ni ang.

Online-a dil tur
Serchhip DC chuan thuchhuah siamin, certificate hrang hrang - tribal certificate, income certificate leh residential certificate chu online kaltlangin DC pisa aṭanga pek chhuah tawh tur a nih thu a tarlang a, "Certificate-te hi online kaltlang chauha pek chhuah a nih tawh dawn avangin, dil duh leh hre chiang duh tan e-district facilitation centre, DC pisaah emaw, CSC centre emaw pan theih a ni," a ti.

Inhrilhhriatna hun
Nimin khan Serchhip DC conference hall-ah DAY-NULM hnuaia Employment Through Skill Training & Placement (ESTP)-a training turte tana hriat tur ṭulte inhrilhfiahna hun UDPA department-in an buatsaih. ESTP hnuaiah hian mi 30-in motor khalh, mi 80-in puanṭhui, mi 30-in beauty & wellness leh mi 30-in food & beverage an zir dawn a ni.

Certificate hlan
Assam Rifles leh Mizoram Hindi Prachar Sabha-te'n, Aizawl leh Serchhipa Hindi Communicative Language Training an buatsaiha zir zo mi 40-te chu nimin khan Aizawla AR hmunah certifcate hlan a ni.