Aizawl West-a MLA candidate tur kan hual tawh - MPCC President
Congress party president Lal Thanhawla chuan, Aizawl khawpui chhunga MLA an neih lohna bial pathum - Aizawl West I, II leh III-ah kumin kum tawpa MLA inthlan awm tura an candidate turte an hual tawh thu a sawi.
July 31, Thawhlehni tlaia Sairang Sihhmuia mi thar lawmluh inkhawmah thu sawiin Lal Thanhawla chuan, "Aizawl khawpui chhung bikah, Aizawl West I, II leh III bialah kan party-in hma a sawn nasa hle. Heng bial pathumahte hian Congress party chuan tling ngei tura ngaih candidate tur hual a nei tawh," a ti.
MPCC President chuan, Aizawl West I-ah block committee-in ziakin candidate tur an mi duh headquarters-ah an thlen tawh tih sawiin, "Kan hotute pawh ka sawipui tawh a, in duh tak hi pek in ni dawn," a ti a; nomination committee siam a la nih loh avangin candidate tur chu official-a la puang lo mai an nih thu a sawi.
Politics-in mi tin a nghawng thu sawiin Lal Thanhawla chuan, "Kan tui emaw, kan tui lo emaw, politics hi kan ngaihven a ṭul. Politics hi rin dan sawi mai maina tur a ni lo a, dikna leh takna nen khelh tur a ni. Politics buaina hi silaia kah fel chi a ni lo a, inrem lote inrem theih nana inbiak a ṭul," a ti.
MPCC Communication department chairman PC Laltlansanga pawhin thu sawiin, tui lêt hnuah Aizawl West-I bialah Congress party-in MLA an la neih ngai loh thu a sawi a, "Hei hi kumin 2018 inthlanah thaichhiat a nih ngei ka ring," a ti a; Chief Minister pawhin a bial chhuahsan a, an dinna tlaka an ngaih theihna tur bial himah siam tura ṭan lak a ṭul thu a sawi.
MPCC thuchhuah tarlan danin, Sairang Sihhmuiah hian MNF, ZNP leh neutral aṭangin chhungkaw 11 (voter 27)-in Congress party an zawm thar a ni.