CM hoin ruihhlo do dan tur sawiho

Nimin khan chief minister Lal Than­hawla kaihhruai Ruihhlo Do Core Committee chu Chief Minister's Office (CMO) conference hall-ah an ṭhukhawm a, ruihhlo do dan tur an sawiho.

Meeting kaihruaitu Chief Minister chuan, ruihhlo leh a kaihhnawih thil ti an tam zel chu a pawi a tih thu a sawi a, "Ruihhlo do kawngah nasa taka hmalak tlan a ṭul. Mizoram hi ram dang pahnih nen a inrì bakah, ṭhenawm ramah ruihhlo leh ruihhloa sumdawnna a hluar hle a, Mizoramah pawh ṭhenawm ram aṭangin ruihhlo a lut nasa hle. State rálmuan vangte pawh a ni mai thei," a ti.

Sorkarin ruihhlo do kawngah nasa takin ṭan a la nia sawiin Lal Thanhawla chuan, "Ṭhalai duhawm tak takte ruihhlo bawihah an tàn belh zel loh nan theihtawp chhuah a ṭul hle. Tun kum hnih khat chhunga ruihhlo tawlhtu man zinga 90% chuang chu Court-in thiamloh a chantir tawh a ni," a ti a; awmze nei taka hmalak a nih theih nan kalphung duang turin member-te a sáwm a ni.

Meeting-ah hian ruihhlo tihrêm theih dan tur leh ruihhlo ti thar an tlem theih nana ṭan lak dan tur te, ruihhlo ngaite enkawl kawngah hmalakte leh ruihhlo ṭhat lohzia inzirtirna lama hmalakte an rêl. Hmalak dan tur ngaihtuah turin sub-committee an din a, committee hi Social Welfare minister PC Lalthanliana'n a kaihruai ang.

Ruihhlo Do Core Committee hi ruihhlo do chungchanga sorkar, kohhran leh YMA inràwn khawmna a ni a, State Level Core Committee on Ruihhlo Do-in a rel angin August 4, 2017-ah din a ni.

Committee-ah hian chairman chu Chief Minister niin, CYMA President leh MKHC General Secretary-te chu vice-chairman an ni a, CYMA General Secretary chu member secretary a ni.

Member dangte chu - Home Minister, Law & Judicial Minister, Social Welfare Minister, Chief Secretary, DGP, Law & Judicial Secretary, Health Principal Director, Social Welfare Director, Excise & Narcotics Commissioner, MSACS Project Director, MJA President, Central YMA office bearer-te leh Mizoram Kohhran Hruaitute Committee office bearer-te an ni.