Duhoma leh Henry Van Thio inkâwm

Ṭangrual pawl, Zoram Peoples' Move­ment (ZPM) chief minis­terial candidate Lalduhoma chuan July 31, Thawhlehni khan Myanmar sorkar khawpui Naypyidaw-ah Myanmar vice president Henry Van Thio a kâwm a, Mizoram leh Myanmar thawh dun theih dan turte an sawi dun.

Lalduhoma hian July 31 khan Myanmar Par­liament session neih mek a chhim bawk a; Myanmar vice president Henry Van Thio nen an inkawmnaah hian Chin Unity Forum din chhan leh din dan te, border trade tihchangtlunna atana hmalak dan tur leh trade item atana mipuite thil thar leh siamte telh a ṭul thute an sawi.

Aizawl aṭanga Ka­laymyo (Tahan), Tiddim, Falam leh Halkha inkara bus service tír dan tur te, Aizawl leh Kalaymyo leh Surbungtlang Airfield inkara thlawhna service dan tur te, Lusei leh Hual­ngo naupangte tana Mizo ṭawng zirlaibu inang siam dan turte leh Khampat Bungpui humhalh dan turte an sawi dun bawk.

Lalduhoma hian Thawhlehni zan khan Nay­pyidaw aṭangin Yangon (Rangoon) an pan a, nimin khan Zofa Association of Yangon (ZAY) buatsaih 'Inpumkhatna seminar' ah thu a sawi leh a ni.