Pawl hrang hrangin Champhai DC an thláwp

Champhai Officers' Club (COC) chuan thuchhuah siamin, dan loa sumdawnna leh dan leh thupek kenkawh kawnga Champhai DC Maria CT Zuali hmalakna an thlàwp tlat thu an tarlang a; Lunglei Ṭhalai Pawl pawhin an thlàwp thu an puang bawk.

COC chuan, an patron Maria CT Zuali hmalaknate chu an thlàwp thu sawiin, "Champhai district hmasawnna tura a ṭhahnemngaihna leh inpeknate fakawm kan tiin, hemi kawnga a hmalaknate kan thláwp tlat a ni. Dan loa sumdawnna hian Mizote rilru puthmang a tichhia a, hemi do letna leh ram leh hnam himna tura hmalaknate kan thláwp zel dawn a ni," an ti.

Lunglei Ṭhalai Pawl (LṬP) thuchhuah chuan, dan loa kuhva lak luh chungchanga Champhai DC hmalakna an thlàwp thu tarlangin, "Dan bawhchhetute'n zak miah loa dan rorelna an phût ngam hi Mizoram leh Mizo mipui zah lohnaah kan ngai a, hetiang mi hi kan rama awm ve tlâk loah kan ngai," an ti a; Mizorama thil dik lo thleng rêng rêng an do tih sawiin, a ṭul ang zela dik lohna do turin ramin a kohna apianga kal tura an inpeih thu an sawi.

Hnahthial Ṭhalai Pawl pawhin thuchhuah siamin, dan loa bungraw la luttute'n dan hmanga rorel an phût ngam chungchanga Champhai Ṭhalai Pawl hmalakna an thlàwp thu leh a ṭul anga thawhpui tura an inrin reng thu an tarlang a, "Dan loa sumdawngte'n dan hmanga rorel an phût ngam a nih chuan, dan anga sumdawng turin kan phût tlat a ni," an ti.