Haw duhte haw phalsak turin chah

Khawzawl bawrhsap Zothan­mawia chuan nimin khan thuchhuah siamin, Khawzawl district-a village task force (VTF)-te chu an khua/venga haw duhte chu Covid-19 an vei emaw, vei rinhlelhawm emaw an nih loh chuan an haw phalsak turin a hriattir.

Khawzawl district-a khua/veng ṭhenkhatah VTF-te'n Aizawl leh Mizoram hmun dang aṭanga hawte lo khung hrangin, Covid-19 free certificate tel lo chuan an khua/veng chhungah luh an phal lo ṭhin tih hriat a nih thu a tarlang a; chuvang chuan Khawzawl District Task Force on Covid-19 chairman ni bawk Zothanmawia chuan hriattirna a tichhuak a ni.

•    Mizoram chhung hmun dang aṭanga haw duhte chu Covid-19 vei emaw, rinhlelhawm emaw an nih loh chuan an haw phalsak tur.

•    Covid-19 veite nena inhnìm hnai emaw, rinhlelhawm emaw an awm chuan bialtu zonal officer/magistrate hnenah thlen thuai tur a ni a, mahni thua lo quarantine emaw, certificate lo phût loh tur.

•    Mahni khua/veng bil huam chhunga lockdown puanin a chhehvel khua/veng leh district administration thlenga nghawng ṭha lo a neih ṭhin avangin mahni khaw bil tan lockdown puan loh tur.

•    Covid-19 vanga lockdown puan ngai nia a lan chuan District Magistrate hnenah thlen hmasak tur a ni. Medical lama mithiamte nen inráwn chungin a ṭul a nih chuan 'The Mizoram Epidemic Diseases (Covid-19) Regulations, 2020' chhunga Regulation 11(1)-in thuneihna a pek angin District Magistrate-in containment area-ah a puang thei a, District Magistrate thutlukna chu thu tàwp a ni ang.