RD Minister-in Solar Water Pump a hawng

Rural Development minister Lalruatkima chuan, Ministry of Home Affairs hnuaia Border Area Development Programme (BADP) additional fund 2019-2020 kaltlanga cheng nuai 270 hmanga siam nizung tha chakna hmanga Vaphai khuaa tui pump chhuahna Mausang Solar Water Pump System a hawng.

Lalruatkima chuan Vaphai khuain nizung tha chakna hmanga tui pump chhuahna Mausang Solar Water Pump System a nei thar chu a lawmpui thu sawiin, ni tin mamawh - tui hnianghnar zawka an dawn theih nan ṭangkai taka an hman a beisei thu a sawi.

Sorkarin mirethei zawkte’n leirem an rah theihna turin theihtawp a chhuak mek tih sawiin Lalruatkima chuan,”Kum thar lamah sorkar flagship programme SEDP kalpui tum a ni a, ramri dep khuate tih hmasawna tih changtlun hi sorkarin a ngai pawimawh hle a ni,” a ti.