MHIP-ah politics a leng lo - MHIP President

Mizo Hmeichhe Insuihkhawm Pawl (MHIP) general headquarters president Saipuii chuan, MHIP-ah politics lak luh a remti lo tih a sawi.

Khatla branch MHIP-in an kum 40-na, Ruby Jubilee nimina an lawmnaah thu sawiin Saipuii chuan, politics vanga MHIP chhunga boruak ṭha lo awm ṭhinte chu a bo vek tawh niin a sawi a, "MHIP Gen. Hqrs hruaitu tam zawkte chu minister leh MLA nupuite ni hlawm mah se, president mawhphurhna ka chelh chinah MHIP-ah politics sawi rîk leh lak luh ka remti lo a, president ka nih chhung chuan MHIP thupui leh hmasawnna tur bak thil dang a leng dawn lo," a ti.

Khatla Branch MHIP lawmna hi an president Lalliani'n a kaihruai a; Aizawl West-III bialtu MLA Vanlalzawma pawhin hmanpuiin, MHIP-in mite ṭanpui tih thupuia an hmang chu ropui a tih thu a sawi.

Khatla MHIP hi June 19, 1978 zanah din a ni a, member 1,380 an awm mek a ni.