B Sairengpuii in ṭhiah ṭan a la ni lo ; Hunthar YMA-in sorkar a che muang an ti
Aizawl bawrhsap Dr A Muthamma, Aizawl District Disaster Management Authority (ADDMA) chairman ni bawkin Aizawl Hunthar Venga B Sairengpuii (L) in ṭhiahna tur thupek, June 16, 2018-a a tihchhuah hnuah hmalak nghal a ni a, mahse, a ṭhiah
ṭan a la ni rih lo. Hetih lai hian, Hunthar Veng Branch YMA chuan, an venga lei tlahniama sorkar hmalakna an duhkhawp loh thu an tarlang.
Hunthar Veng YMA secretary Zohmingthanga Zote-in Vanglaini palai zawhna chhanga a sawi danin, B Sairengpuii in ṭhiat turin nimin lamah hmalak a ni a, a tukverh velte chu lak thlak a ni tawh hlawm. Chutih laiin, lei tlahniam chungchang buaipuitu leh in ṭhiat tura ngaih AIE lamin in hi an ṭhiat ngam lo a; company dang pakhatin ADDMA hnenah an ṭhiah ngam thu nimin khan an thlen a ni.
Hunthar Veng Branch YMA chuan nimin zing khan lei tlahniam ṭhin vanga an vengin harsatna hrang hrang an tawh ṭhin tawh dan an thlir lêt. Thuchhuah siam nghalin, an venga lei tlahniam ṭhin, kum 1990 vel aṭanga che ṭan tawh, chhungkaw tam takin an in leh lo an chàn tawh hnu leh, in luah sawn rum rum ngaia vawi eng emaw zat buaina a awm hnu pawha tun thlenga sorkar hmalak dan chu a muang hlea an ngaih thu an tarlang.
Hunthar YMA chuan, kum 2017 leh 2016-ah pawh harsatna namenlo a thleng a, sorkar lamin a tihdamna turin Central-ah project lian tak siam nghal a nih tur thu an sawi tih tarlangin, "Kum khat a ral hnuah pawh chu pawisa la chhuak thei lo anga an sawi reng hi kan hrethiam lo hle," an ti.
YMA tarlan danin, Central aṭanga sum hmuh hmaa hman turin Mizoram sorkara DMR department sum aṭangin cheng nuai 200 sanction a ni a, chumi hmang chuan AIE-te thawhtir a ni. Khawtlang hruaitute nen hna thawh dan tur sawiho a nih hnuah AIE chuan hna an ṭan a, mahse, khawtlangin ngaihdan leh duh dan an sawite chu an ngai pawimawh lo hle a ni.
AIE-in cheng nuai 200 an hman danah an lungawi loh thu sawiin Hunthar YMA chuan, "Veng hruaitute'n kan sawi lâwk ang ngeiin fûr ruahtui a lo tla a, an hnathawh 80% chuang chu awmze awm lo a ni leh ta mai hi kan hrethiam lo hle," an ti.
Hunthar Branch YMA chuan, lei tlahniam leh min ṭhin bul hnaia chengte himna tur tak tak ngaihtuah kawngah sorkar chu che chak tur leh Central-a project an siam pawh a chhuah thuai theih nana hma la turin sorkar thuneitute an ngen a; company hna thawktute pawh hnam dang kuta hlan chhawng kual lo a, khawtlang himna tur ngaihtuah chunga hna thawk tak tak turin an ngen bawk.
Hunthar Veng Branch YMA tarlan danin, tun hnaia lei tawlh leh avangin chhungkaw 20 vel chu an chenna in aṭangin sawn chhuah leh an ni.