MJA-in National Press Day an hmang ; Social media-ah thu dik aiin thu dik lo A tam emaw tih tur a ni - IPR Minister

Mizoram Journalist Association (MJA) chuan nimin khan Aizawl Press Club-ah National Press Day an hmang. An hun hmanpuitu Information & Public Relations (IPR) minister Lalruatkima chuan, social media-ah thu dik aiin thu dik lo a tam emaw tih tur a nih thu a sawi.

Minister Lalruatkima chuan, social media-in Mizote a nghawng nasat thu sawiin, "Kan Kristianna leh Zo nun ze mawi nasa takin a nghawng. Tun ang zela kan kal chuan min ei chhe mai dawn niin a lang," a ti a; social media-ah a páwnga taka insawisel vak vak ringawt chu ṭha lo a tih thu sawiin, "Social media-in kan nun a tihchhiat hma hian theihtawpin ṭang ila, kan Zo nun ze mawi leh kan Kristianna chawi nung zel turin ṭan i la zel ang u," a ti.

IPR Minister chuan journalist-te chu ṭan la zel tura fuihin, "Youtube-ah thu thar an ti zung zung a, journalist ethics hre miah loin social media hmangin chanchin thar an theh darh a, edit a ni ve tawh si lo. Hmànlai deuha thu inziah maksiak hun kha a ang lek lek. Hengte hian a chhe zawng leh a ṭha zawngin mipui min hruai kâwi thei a ni," a ti a; social media-ah hian thu dik aiin thu dik lo a tam emaw tih tur a nih thu a sawi a ni.

Social media lama thu thehdarhte hliahkhuh tur khawpa journalist-te an ṭan a ngaih thu sawiin Lalruatkima chuan, "Kalphung dik hi mipui i zirtir teh ang u, ṭan i la tlang teh ang u," tiin chanchinbumite a sáwm.

Mizoram sorkar chu journalist-te tan a din reng thu sawiin Minister chuan, "Nangni lam pawhin sorkar hmalaknate in puanzar ṭhin tawh angin puangzar zel rawh u. Sorkar khalh ngíltu tur in ni a, chutiang lamah pawh ṭan la zel rawh u. Hriatna lama mipui min ti bengvartu in ni a, huaisen takin mipuite thu dik hrilh ngam a pawimawh. Fimkhur taka in kal a ngai," a ti.

IPR Minister chuan, journalism chu inkaihhruaina ṭha tak nei a nih thu sawiin, "National Press Day a lo thlen hian in rilru leh in ngaihtuahna tuai tharin, mipui beng in ni tih hre nawn leh ang che u. Dikna leh rinawmna nen, mipuiin thu dik an hriat theihna atana ke pên a pawimawh. Kan thuchhuahte chu a dik tur a ni," a ti a, lehlam lehlamah thlir tawn ṭhin turin journalist-te a chah.

Lalruatkima chuan, chanchinbumite thuchhuah chu a lái tur a nih thu sawiin, "Political party, kohhran leh páwl ṭan bik leh ṭan loh bik in nei tur a ni lo angin, huaisen takin kal zel ang che u. Freedom of Press tih rualin, zalenna hman sual palh a awm thei. Democracy ti democracy turin ṭan lak zel a pawimawh," a ti.

National Press Day puala inkhawm hi MJA president Zonunsanga'n a kaihruai a, general secretary Zohmingmawia'n report pein, ex-officio Vanlalrema Vantawl-in thuhmá a sawi.

Vanlalrema Vantawl chuan, Nelson Madela-a'n 'Media zalen chu democrary banpui pakhat' tia a sawi thu sawiin, "Kan ramah media a zalen a ngai a, chutah chuan sorkar pawhin thui tak mawh a phur ngei ang. Thuthar thehdarhtute hi mi hnuaihnung zawkte thlavâng hauh tur leh aw nei pha ve lote tana aw chhuah tura beisei kan ni," a ti.

Journalist ethics leh an zalenna humhim turin kum 1956 khan Press Commission hmasa ber din a ni a, kum 10 a liam hnuah media mite hnathawh vil tur leh an thlavang hauh turin Press Council of India chu November 16, 1966-ah din a ni. Press Council of India din champha pual hian kum 1997 aṭangin National Press Day hman ṭhin a ni.