Thantlang beih hnuah Tuipuiralah Ráltlân mi 1,000 chuang lut tawh

Myanmar sipaite'n October 29, 2021-a Chin state-a Thàntláng khuaa bomb an thlâk hnuah Mizorama Tuipuiral Group YMA huam chhungah ráltlân mi 1,000 chuang an luh belh tawh.

Champhai district-a Tuipuirâl Group YMA secretary B Challianngura hnen aṭanga thu dawn danin, an huam chhungah hian nimin khan Myanmar ráltlan mi 2,830 vel an awm mek a, October 29, 2021 hnuah mi sang khat chuang an lut tawh. Khaw pathum chu khaw puma Mizorama rawn luh duh an awm a, mahse, lo dâwl zawh loh hlauhthawnna avangin khaw puma lut thla lo turin an inchah a ni.

B Challianngura chuan, mi eng emaw zat rawn luh belh mah se, harsatna lian tham an nei lo tih sawiin, "Hmalak dan tur kan thiam viau tawh a, ei leh in turah harsatna em em kan tâwk lo, an zinga tam tak hi chu khawsak harsa lote an ni a, ram danga chhungte nei an ni fur a, anmahni ei tur leina neite an ni hlawm," a ti a; Covid-19 avanga inkhung hran ngai ṭhin chu an buaina ber pakhat a nih thu a sawi.

Myanmar sipaite'n October 29-a Hakha district chhung, Thàntlang khua an beihnaah hian in 160 chuang a kâng a, chu'ng zingah chuan biak-in pahnih a tel a ni.

Hetih lai hian, Hnahthial district chhungah Myanmar ráltlân mi pathum an luh belh leh a, nimin chhun thlenga district chhunga ráltlan awm zat chu mi 2,313 an ni a, an zingah chhungkaw 419 an tel.

Hnahthial DC pisa chhinchhiah danin, khaw hrang hranga ráltlân awm zat chu - Thingsaiah mi 903, Cherhlunah mi 188; Bualpui H-ah mi 155, Ngharchhipah mi 169, New Ngharchhipah mi 456, Tarpho-ah mi 67, South Chawngtuiah mi 25, Khawhri-ah mi 62, Tuipui D-ah mi 35, Aithûrah mi 14, Leite-ah mi 11, South Vanlaiphaiah mi pariat leh Hnahthialah mi 228 a ni.