Tuirini lei chima mawhphurtute hrem turin Darlawn MZP-in Mizoram sorkar an phût

Mizo Zirlai Pawl (MZP) headquar­ters, Darlawn chuan thuchhuah siamin, sorkarin Mizoram hmar tlangdung kawngpui pawimawha Tuirini leh tun thlenga a la dawh lo chu runthlak an tih thu leh hriatthiam har an tih thu an tarlang a; lei chima mawhphurtute chhui chhuaka hrem ngei turin Mizoram sorkar an phût.

Darlawn MZP chuan, "Hmar tlangdungin kan rin ber Tuirini lei siam a nih mek laia February 13, 2018-a chim chu, fûrpui hma ngeia sorkarin siam zo tura min tiam, vawiin thlenga thîr pakhat pawh dawh kai a la ni lo leh sorkar hmalakna muang lutuk hian hmar tlangdung mipuite harsatna tawh a ngaih pawimawhsak lo hle tih a lantir a, runthlak kan tiin hriatthiam har kan ti hle a ni," an ti.

Darlawn MZP chuan, "Tuirini lei chima mawhphurtute hi sorkarin chhuichhuakin, an phu tâwk hremna pe ngei se kan ti. Hmar tlangdung mipuite'n harsatna nasa tak kan tawh mek hi sorkar hian rang taka hma min laksak turin kan ngen nawn leh a ni," an ti a; an ngennain awmzia a neih loh chuan a ṭul ang leh an remhriat dan anga hma an lak dawn thu an tarlang.

Thu dawn danin, Chalfilh group YMA-in Tuirini leia lirthei kal kaina tura an siam chu tun hnaiah tuilianin a tichhe tawh a, lirthei kal kai a harsa rih hle a ni. PWD-in Tuirini lei dawh ṭhat hna an ṭan tawh nia thu dawn a ni bawk.