Tuirial bialah MNF thlan tlin a ni

3rd November, 2021

October 30, 2021-a Tuirial Assembly constituency by-election-a vote tlate chu nimin khan Kolasib College-ah chhiar a ni a, MNF candidate K Laldawngliana thlan tlin niin, amah hnaih bertu ZPM candidate Laltlanmawia chu vote 1,284-in a hneh.

Tuirial bial by-election-a vote tlate chu nimin zing dar 8 aṭanga chhiar ṭan a ni a, chawhma dar 11:15 velah chhiar zawh a ni. Thlan tlin tâk K Laldawngliana hian vote tla 14,560 aṭangin vote 5,820 a hmu a, chu chu 39.97% a tling. Kum 2018 MLA inthlanpuia thlan tlin Andrew H Thangliana'n vote tla aṭanga a vote hmuh 30.80% aiin a sang zawk.

ZPM candidate Laltlanmawia'n vote 4,536 (31.15%) a hmu a, INC candidate Chalrosanga Ralte-in vote 3,927 (26.97%) leh BJP candidate K Laldinthara'n vote 246 (1.69%) a hmu bawk. Vote thlak zinga mi 61 (0.42%) chuan candidate zingah duh an neih loh vangin None of the Above (NOTA)-ah vote an thlâk thung.

Tuirial bialah hian khaw 17-ah polling station 27 awmin, MNF chu polling station 21-ah an chak a; ZPM chu Lungmuat, Mualvum leh Kawnpui-V(A)-ah chakin, INC chu Nisapuiah chiah an chak thung. Kawnpui-II polling station-ah chuan MNF leh ZPM-in vote 248 ve ve an hmu.

Vote tlate hi thawh li-ah chhiar zawh a ni a, round tinah K Laldawngliana a chak. Inhnehna sanna ber Bualpui polling station-ah chuan MNF candidate-in amah hnaih bertu ZPM candidate chu vote 116-in a hneh.

Vote chhiarna hmunah hian ZPM candidate Latlanmawia leh INC candidate Chalrosanga Ralte te an awm a, thlan tlin tâk K Laldawngliana a kal lo thung. Boruak muanawm tak hnuaiah vote chhiar zawh a ni.

Kum 2018 inthlanpuiah khan Tuirial bialah hian independent (ZPM)-in vote 4,387, MNF-in 4,183, INC-in 3,748, NPP-in 1,209, BJP-in 487, PRISM-in 104 leh independent-in vote 66 an hmu a ni.

Thlan tlin tak K Laldawngliana (49) s/o K Ngurkhuma (L) hi Dinthar, Aizawla khawsa a ni a, kum 2018-2023 atana MIZOFED chairman a ni. MNF General Hqrs-ah executive member leh MNF ṭhalaiah secretary a ni ṭhin a, MIZOFED chairman a nih hnuah erawh chuan party-ah nihna a nei tawh lo.