Tuirial bial inthlanah vote 81.29% a tla ; Tripura-a awm Bru-te'n vote an thlâk lo

October 30, Inrinni khan Tuirial Assembly constituency by-election neih niin, tluang takin vote thlak a ni a, vote 14,561 tlain, hei hi vote awm zat aṭanga chhûtin 81.29% a tling. He inthlanah hian Tuirial bial chhunga vote nei Bru, Tripura-a awm mek mi 665-te'n vote an thlak lo nia hriat a ni.

Tuirial bialah hian khaw 17 awmin, polling station 27 a awm a, zing dar 7 aṭanga zan dar 6 thleng vote thlak a ni. Zing dar 7 aṭanga tlai dar 5 thleng chu mipui náwlpui tana vote thlak hun atan ruahman a ni a, tlai dar 5-6 inkar chu Sabbath serhtute leh Covid-19 vei mekte vote thlak hun atan ruahman a ni thung a, Covid-19 vei mek zinga mi 34-in PPE nena inthuamin vote an thlak.

Polling station tinah official-te bakah MPF-te an duty a, Tripura-a Bru-te'n vote an neihna Hortoki leh Zodinah chuan YMA-te an duty tel. Tripura Bru-te chu political party ṭhenkhatin vote thlaktir dan an ngaihtuah nia hriat a nih avangin Central YMA ruahman angin an rawn luhna tur Kanhmun, vote an neihna Hortoki leh Zodin bakah, kawng lakah YMA member-te an duty a, October 29 zanah phei chuan an duty tlaivar a ni.

Vanglaini palaiin Hortoki leh Zodin khuaa duty a biakte chuan, Tripura-a Bru zingah vote thlak an awm loa an hriat thu an sawi. Tripura-a Bru-te'n vote an neih tamna khua Zodinah chuan vote 216 (29.03%) chiah a tla a ni.

Inthlan campaign boruak lian viau mah se, vote thlak ní-ah chuan boruak a dài a, harsatna lian tham thleng hriat a ni lo. Bial chhunga khaw luh dawnah police, central force leh MPF-te awmin, lirthei veivâk an endik.

Tuirial bialah hian voter 17,911 an awm a, 7,152 chu mipa niin, 7,409 chu hmeichhia an ni a; voter 14,561 (81.29%)-in vote an thlak a ni.

Kum 2018 Assembly inthlanpuiah khan Tuirial bialah hian voter 16,874 awmin, mi 14,245-in vote an thlak a, vote tla chu 83.78% a tling. Kum 2018 aia vote tla percentage a hniam chhan hi Covid-19 vang leh Tripura-a Bru-te'n vote an thlak loh vanga ngaih a ni.

Vote tlak ṭhatna ber polling station, Lungmuatah chuan vote nei mi 487 zinga mi 443 (90.96%)-in vote an thlak a; vote tlak tlemna ber Zodin polling station-ah chuan vote nei 744 zingah 216 (29.03%) chiahin vote an thlak thung.

Tuirial bial by-election-a vote tlate chu November 2, Thawhlehni zing dar 8 aṭangin Kolasib College-ah chhiar a ni ang. Tarlan tawh angin, by-election-ah hian candidate pali - K Laldinthara (BJP), Chalrosanga Ralte (INC), K Laldawngliana (MNF) leh Laltlanmawia (ZPM)-te an awm a ni.

Inthlan chanchin tlangpui
1) Mipa 7,152 leh hmeichhia 7,409-in vote an thlak
2) Kum 2018 MLA inthlan aiin vote tla percentage a hniam
3)Covid-19 vei mi 34-in PPE nen vote an thlak
4) Vote tlak ṭhatna ber Lungmuatah 90.96% a tla
5) Vote tlate November 2, Thawhlehni zing dar 8 aṭangin chhiar a ni ang