Covid-19 hritlang satliah anga palzam tum lo turin mipui chah

State Referal Hospital - Zoram Medical College (SRH-ZMC)-a Covid Task Force hotute nimina medical superintendent HC Laldina pisaa ṭhukhawm chuan, Covid-19 kai inringhlel leh symptom neite chu a rang thei ang bera an swab sample endiktir tur leh hritlang satliah anga palzam tum lo turin mipui an chah.

Ṭhutkhawmnaa SRH-ZMC ICU in-charge tarlan danin, SRH-a Covid-19 vanga thi tawh zinga 60% chu Covid-19 vaccine la la lo an ni a; 16% chu vaccine la kim tawh niin, 24% chu vaccine dose khatna la tawh an ni. Vaccine la tawh zinga thite chu natna khirh chi hnih/thum nei leh kum 80 chung lam an ni tlangpui.

Dr HC Laldina chuan, hmai tuamna hman danah fimkhur a ngai tih sawiin, "Mahnia kan awmin mask kan vuah ṭha a, ṭhiante kan kawm leh mi zinga kan awmin kan la thla leh ṭhin hi a pawi a, kan ṭawng rêng rêngin kan hmui leh hnâr khuhin hmai tuamna kan vuah ngei a ṭul," a ti a; hripui vei SRH-a awmpuitu zingah ṭha taka hmai tuam leh mutnaah pawh tuam ṭhin zingah hripui vei sawi tur an awm lo niin a sawi.

Covid Task Force nodal officer Dr PC Lalramenga chuan, SRH ICU-a damlo an enkawlte dinhmun an zir chiannaah, sample endik vat leh hripui vei tih inhriat chhuaha enkawl nghal a pawimawh thu a sawi a, "Positive zat aṭanga chhûta thi kan tlem hi a lawmawm kan tih rualin, ICU-a na tak tak lut an tlem phah lo a, an zingah thi an pung zel a ni," a ti.

Dr Lalramenga chuan, "Inringhlel leh symptom neite chu an veng/khua task force emaw medical mi hnaivaite emaw hriattirin endikna hnai berah an sample endiktir vat se kan duh," a ti a; ICU-a enkawl zingah thi an awmin a tuartute tan a nat bakah damlo enkawltute pawhin hrehawm an tih thu a sawi.

ICU in-charge Dr Lalnunmawii Sailo chuan, ICU-a damlo na tak tak zingah hritlang satliah anga palzam tum an tam tih a sawi a, "A tirah dam leh mai tura an inngaih avangin an ngaihthah a, a rei deuh hnu leh an nat zual hnuah sample an endiktir chauh a, positive tih an inhriat meuh chuan ICU-a luh ngai khawpin an lo tlai hman tawh ṭhin," a ti.

Dr Lalnunmawii chuan, Covid-19 veite chu hri an kai tirh aṭanga na tak an awm nghal ngai loh thu te, ṭhalai hriselte leh mi chak ṭha zawkte chuan hritlang pangngai angin na vak loin an dampui thu te, mi tinin chênpuite leh an bul hnaia awmte an ngaih pawimawha an fimkhur a ṭul thute a sawi.

Hripui vei tih hriat hmate chu Monoclonal Antibody Cocktail (MAC) khai nghal a nih chuan ICU-a luh ngai loin inenkawl dam theih a nih thu leh, an nat zual hnua hriat chhuahte chu ICU an luh tawh chuan MAC khaiin awmzia a neih tawh loh thu a sawi bawk.