Rev. Chanchinmawia thah tirtua puhtu lakah Zoramthanga'n Court-ah complaint a thehlut

Chief Minister hlui, MNF president Zoramthanga chuan Rev. Chanchinmawia thihna chungchanga rua­hmanna siamtu leh thah tirtu anga amah puhtu Than­sanga, Chhinga Veng lakah nimin khan 1st class judicial magistrate H Lalduhsanga hnenah criminal complaint a thehlut.

Zoramthanga chuan criminal complaint a theh­luhna Court-ah, "MNF Party-ah president nihna chelh lai mek ka ni a, Pathian khawngaihna zarah Chief Minister term hnih ka lo ni ve tawh bawk a ni. Congress Party chanchinbu 'Congress Thlifim' Vol.3, Issue No.3, March 2018-ah Presbyterian Khatla Pastor Quarter-a Rev. Chanchinmawia a thih chungchangah dawtin keima thah tir ang leh a thihna chungchanga rua­hmanna siamtu ah min puhna thu an lo chhuah a, hei hi Thansanga intiin a sawi aṭanga an chhuah a nih thu an tarlang a ni," a ti.

Thansanga thusawi chungchang hi media leh social media hrang hrangah tarlan a nih thu sawiin Zo­ramthanga chuan, "Zoram pumah nasa takin ka hming tihchhiat a ni a, ka ṭhian te, ka thawhpui te, official-te leh, Zoram mipuiten min hmuh hniam phah thei a ni. Tin, Thansanga hi ka mi hriat ngai pawh a ni lo hrim hrim a," a ti a, Thansang chungchang Court-a ngaihtuah atan leh a phu tawk hremna pek a nih theihna atan criminal complaint hi thehlut a nih thu a sawi.