Serchhipah vawk chaw channa khawl sem

Serchhipa Animal Husbandry & Veterinary (AH&Vety) training hall-ah nimin khan FOCUS hnuaia vawk vulh tura thlan mi 10-te hnenah vawk chaw channa khawl (chaff cutter) pekna leh vawk chaw sawngbawl dan zirtirna hun hman a ni a, AH&Vety deputy director Dr Lalrotluanga Sailo in a hmanpui.

Dr Lalrotluanga Sailo chuan ran vulh tura thlan chhuahte chu sorkarin vawk in sakna tur a pek thu a sawi a, "Vawkpui tur a note paruk ṭheuh pek an ni bawk ang. ASF avangin vawk an thi nasa em em a, mahse chu chu hnual phah nana hmang loin chona thar angah ngaia hma lak a ngai," a ti a, ran vulhtute chu sorkarin a theih chin chinah puih zel a tum thu leh ran chaw upna tur hmanrua pawh pek an la nih tur thu a sawi.

Serchhip district FOCUS project manager K Laltlanmawia tarlan danin, sorkarin ran chaw siamna atan cheng nuai 10 a ruahman hmangin FOCUS Serchhip chuan vawk chaw leh ar chaw an siam dawn a; FOCUS hnuaiah khaw 20-a chhungkaw 550-te vaimim chin tir an ni a, khaw 30-ah bekang chintir mek a ni bawk.

Vaimim hi kg. khat Rs. 20 leh bekang kg. khat Rs. 100 zelin loneitute hnen aṭangin an lei let leh vek ang a, vawk leh ar chaw siam nan hman a ni ang.