SMATEE result ennawn leh a ni ; Zirlai nu leh pate'n mak an ti

Mizoram state quota-a professional course hrang hrang, JEE leh NEET-in a huam lohte zir tur thlanna, State Medical and Technical Entrance Examination (SMATEE), 2021 result tihchhuah tawh chu ennawn leh a ni. Zirlai nu leh pate'n result ennawn a ni leh result tihchhuah dan mak an tih thu Vanglaini an hrilh.

SMATEE result hi September 30, 2021 khan tihchhuah a ni a, October 4, 2021 khan Higher & Technical Education Director chuan result hi ennawn leh a nih thu a tarlang. HTE Director hian notice a tihchhuahah hian result ennawn a nih chhan a tarlang tel lo.

Zirlai nu leh pate chuan result tih-chhuahah hian zirlaite mark hmuh zat tarlan a nih loh thu sawiin, "Zirlaite mark hmuh zat tarlan a ni lo hian ngaih a tiṭha lo hle. A tihṭhat dan indawtin an tar chhuak ringawt. Kum dangah chuan mark hmuh zat hi tarlan ṭhin a ni," an ti.

Sorkarin answer key pawh kuminah a tihchhuah loh thu sawiin zirlai nu leh pate chuan, "SMATEE exam hi tick tawp a nih avangin zirlaite'n answer key aṭangin an mark hmuhzat tur an chhut thei ṭhin a ni," an ti a, tute'n emaw answer key an siam erawh pali a awm thu an sawi.

Zirlai nu leh pa zinga ṭhenkhat chuan September 30 khan HTE Director hnenah result tihchhuahah mark hmuh zat tarlan a nih loh avang leh answer key tihchhuah a nih loh avangin an complaint a ni.

Vanglaini palai zawhna chhangin HTE (Technical Wing) hotute chuan zirlaite mark hmuh zat tarlan leh an tum thu sawiin, "Buaipui mek a ni a, zawh fel a ni ṭep tawh," an ti.

HTE (Technical Wing) hotute chuan NEET result an nghah deuh thu sawiin, "NEET-a tlingte'n an duh leh zawk ṭhin avangin, result tihchhuah thar turah kan nghak deuh a ni," an ti a, result ennawn chu an peih fel ṭep tawh thu an sawi.

SMATEE atan hian mi 1557-in hming an pe lut a, mi 1350-in exam hmachhawnin, hming pe lut zinga mi 207-in exam an hmachhawn lo.