Ram leh hnam phatsantuah MNF leh Lok Sabha MP puh

Mizoram Pradesh Youth Congress Committee (MPYCC) chuan thuchhuah siamin, Citizenship Amendment Act, 2019 dodalnaah Mizote an inlungrual em em laiin, MNF sorkar erawh chuan BJP sorkar malsawmna dawn beisei vangin BJP duh dan an thláwp tih an tarlang a, "Ram leh hnam an phatsan a ni," an ti.

MPYCC chuan, "Mizoram aiawha India ram rorelna sanga ṭhu Pu C Lalrosanga, Lok Sabha MP pawhin Mizo mipui duh dan hnâwl­in Parliament House chhungah ngei Mizo hnam a phatsan a ni," an ti a; MNF sorkarin India ram, Hindu rama siam tumtute thil tih thláwpa ram leh hnam pawi a khawih duh ta mai chu pawi an tih thu an sawi.

BJP sorkarin Zo hnahthlak, Mizoram leh ram danga chengte inkar tikak zau turin National Register of Citizen (NRC) dan siam tumin hma an la mek tih sawiin, "Hetiang dinhmuna ram leh hnam a din mek laia MNF sorkarin a dodal zawng ni lo, a ­thláwp zawng leh ram leh hnam phatsan zawnga chêt a la zel hi kan dem tak zet a, MNF party hi Mizo nationalism sawi ve tawh lo turin kan chah a ni," an ti.