TZP inkhawmpui IPR Minister-in a hmanpui

Tuipuiral Zirlai Pawl (TZP) chuan nimin khan Dungtlang community hall-ah General Conference vawi 35-na an hmang a, Information & Public Relation (IPR) minister Lalruatkima'n a hmanpui.

Minister Lalruatkima chuan, Tuipuirala khuate chu khaw inthurual leh nuam tak an nih thu sawiin, mi ropui tak takte chawr chhuahna hmun a nih thu a sawi a; thiam leh hmangchang hriate din chhuah zelna khawvel a nih thu sawiin, "Pasal tlak, rilru puitling leh eizawnna ngêlnghet nei thei turin Mizo mipate kan inzir a ngai a ni," a ti.

Lalruatkima chuan, "Mizote hi hnam tlemtê, hnam chak leh ropui ni thei tura fa neih tam inzirtir a ngai a, kan ramri dep thlenga kan luahlum a ngai a ni," a ti a; hmasawnna ruhrel din kawngah rinawm leh taimak a ngaih thu sawiin, "Hlêp tam aia hna ṭha thawh tam lamah inel a ṭul," a ti. Kalkhawmte chu khaw­tlang tana hnawksaka awm lo tur leh an theihna ang zelah theihtawp chhuah turin a chah a ni.

TZP inkhawmpuiah hian thupui chu 'Zirlaite leh tunlai khawvel' tih a ni a, thupui hi Champhaia SSA additional DPC H Lalhminghlua'n a sawi. East Tuipui bialtu MLA Ramthanmawia pawhin thu a sawi a; kum 2019 chhunga zirlai pass ṭhate hnenah lawmpuina an hlan bawk.

TZP General Conference hian resolution pathum an pass a; chu'ngte chu - East Tuipui huam chhunga Civil SDO dah, sorkar enkawl HSS din leh an bial chhunga damdawi-in, doctor awm lohnaa doctor dah phûtnate a ni.