CM hian engtikah nge Dr BD Chakma A ṭhutna turah a ṭhuttir dawn kan en mek - Mizoram BJP President

9th January, 2020

BJP Mizoram Pradesh president Vanlalhmuaka chuan nimin khan an party pisaah thuthar thehdarhtute a kâwm a; chief minister Zoramthanga'n engtikah nge BJP MLA Dr BD Chakma chu a ṭhutna turah a ṭhuttir dawn tih an en mek thu a sawi.

Vanlalhmuaka chuan MNF leh BJP chungchanga zawhna chhangin, CM Zoramthanga'n engtikah nge BJP MLA Dr BD Chakma chu a ṭhutna tur takah a ṭhuttir ang tih an en mek thu a sawi a, "Mahse, kan nawr lui dawn lo," a ti.

Mizoram BJP President chuan, MNF president Zoramthanga'n NDA an nih thu a sawi fo thu leh chu chu BJP thawhpui a ni tih tichiangtu a nih thu sawiin, "BJP chuan central-ah khuan kan tih tur dik tak kan ti," a ti a; Lok Sabha MP C Lalrosanga chu a ṭhutna tur dik takah an tiam anga ṭhuttir a nih thu a sawi.

Hetih lai hian, September 22, 2019-a Vanapa Hall-a Martarte Ni hmannaah CM Zoramthanga chuan, "Minister atana Dr BD Chakma dah tumna a awm tih eptu lamin an sawi ri hi kan vawi khat hriatna a ni. Eptute min beihna mai mai a ni," a ti a; minister atana Dr BD Chakma dah chungchang chu amahin emaw, cabinet-ah emaw, party-ah sawi a la awm loh hrim hrim thu a lo sawi tawh.

Mizoram BJP President chuan, kum 2023-ah sorkarna siam thei turin hma an lak dawn thu sawiin, "Tunah hian Mizoram pumah local committee 530-540 kan nei a, block/mandal 21 kan nei bawk. Primary member 70,000 chuang kan nei a, heng zinga 66,000 hi Delhi-ah kan digitize tawh. Active member chu 777 kan nei mek a ni," a ti.

Vanlalhmuaka chuan, an party chu kalhmang fel tak duan sa zuia kal a nih thu sawiin, "President charge ka lak aṭang hian organisation restructure hi kan hna hmasa ber a ni ang," a ti a; political training (BJP system inzirtirna) local, block leh district level-ah an neih tur thu a sawi.

BJP kaihhruai sorkar laipui aṭangin scheme hrang hrangah sum tam tak Mizoramin a dawn thu sawiin Vanlalhmuaka chuan, "Heng scheme-te hi a dawng tur dik takin an dawn leh dawn loh kan en zui nasa dawn. Dik lo a awm chuan sorkar laipuiah kan thlen zung zung ang. Central scheme chungchangah hian awareness kan nei nasa dawn a ni," a ti.