Health Secretary-in private hospital hnena Thisen pek chhuah chungchang a sawifiah MSHCS zawm lote khuahkhirhna a ni lo - Health Secy.

Health & Family Welfare department changtu secretary H Lalengmawia chuan nimin khan thuchhuah (press handout) siamin, Aizawl Civil Hospital aṭanga thisen lak chhuah danah kalphung thar siam a ni a, chu chuan thisen lak chhuahna kawngah Mizoram State Health Care Scheme (MSHCS) zawm ve lo private hospital-te a khuahkhirh lo niin a tarlang.

Health Secretary chuan, Aizawl Civil Hospital (ACH) aṭanga thisen lak chhuah dan kalhmang tihdanglam a ni tih sawiin, "Civil Hospital Blood Bank aṭanga thisen la ṭhinte tan Mizoram sorkar chuan kalphung thar, a hmaa mi ang lo hlekin a siam. Mimal emaw, eng hospital pawh Civil Hospital aṭanga thisen la turte chuan thisen an lâk chhuah dawn reng rengin Director, Hospital & Medical Education aṭangin phalna lak zel tawh tur a ni," a ti.

HFW Secretary chuan, "Hei hian blood bank aṭanga thisen lak chhuah khuahkhirhna a kâwk lo a, a lak chhuah dan kalphung felfai zawk a awm theih nana thlâk danglamna mai a ni," a ti a; thisen chu a mamawh apiang, empanel hospital a ni emaw, ni lo emaw, a ngai renga chhawr theih a nih thu a tarlang a ni.

Hetih lai hian, Health depart­ment-a doctor ṭhenkhat chuan, MSHCS zawmtu private hospital-te chu ACH Blood Bank aṭanga thisen an lâk dawnah Hospital & Medical Education (HME) Director phalna lak hmasaktir kher phût an nih loh laiin, MSHCS zawm loh vanga sorkarin empanelment a hlihsak tak private hospital-a damlo, thisen mamawhte chu HME Director phalna la tura tih an nih thu an lo sawi tawh a ni. 

Aizawla private hospital-a hotu pakhat chuan, Aizawla private hospital-a damlote'n ACH Blood Bank aṭanga thisen an lak dawnah HME Director phalna laktir an nih thu sawiin, chu chu damlo tan thil buaithlak tak a nih thu a sawi.

Private hospital hotu pakhat chuan, "HME Director hi office-ah a awm reng lo a, a chángin a clinic-ah a awm a, damlo chhungte an kal kual a ngaih nasat phah a, a buaithlak hle," a ti a; tuna sorkarin a tih dan chu, rîkrum thil leh zan lama damloin thisen an mamawh hunah a buaithlak lehzual hle dawn a, thisen lâk mai theih a nih loh chuan, thih phah hial pawh an la awm lo ang tih sawi theih a nih loh thu a sawi bawk.

Aizawla private hospital lâr taka doctor pakhat chuan, ACH Blood Bank aṭanga thisen lak chungchanga sorkar thil tih dan chu doctor-te'n an khel nasat thu sawiin, "Doctor-te hi tih tur leh mawhphurhna nei kan ni a, tuna sorkar tih dan hi chu doctor thlirna aṭang chuan a ethical lo em em a ni," a ti a; Indian Medical Association conference-ah pawh an sawiho thu a sawi.

Sawi chhunzawmin doctor chuan, thisen chu damdawi chi khat a nih thu leh a mamawhtu leh hmangtu tak tak chu damdawi-in ni loin, damlote an nih thu a sawi a, "Thisen pek hi thih leh dam kar thil a ni a, tuna sorkar tih dan hi chu a mak hle. Doctor-te hi sorkar hmelma êm kan ni lo ang a, damlote pawh sorkar hmelma an ni êm dawn em ni," a ti.