KMMTTP kawngpui siamtute LDLOA-in châwl turin an hriattir

Lawngtlai District Land Owners Association (LDLOA) chuan, Kaladan Multi Modal Transit Transport Project (KMMTTP) kawngpui siamnaah zangnadawmna tun thlenga an la dawn loh avangin nimin aṭang khan tiam chin awm loin KMMTTP siamtute hna thawk chhunzawm lo turin an hriattir.

Vanglaini zawhna chhangin LDLOA President chuan, "KMMTTP kawngpui sialin a tihchhiat rama zangnadawmna pek tur sorkarin a tihfel vek tawh tun thlenga pek an la nih loh avangin kawngpui siam hna thawh mek chu an dang tih a sawi a, "Min pek hma chu 'stay order' kan siam hi a kal tlang dawn a ni," a ti.

LDLOA President chuan, nimin aṭang khan kawng siam chhunzawm lo tura hriattirna tichhuak mah se, an duty ṭan nghal lo a, kar leh lam aṭangin an duty dawn tih a sawi. Zawhna chhangin LDLOA President chuan, tunah chuan KMMTTP kawngpui siamah hian kawngpui sira tuihawk luankawr tur siam hna thawh a ni deuh ber tih a sawi a; Court-ah thu kal mek a awm avangin Lawngtlai khaw chhung pawhna tur lai leh Zochachhuah thlen dawn hnaiah kawng la sial tlang loh a awm thu a sawi bawk.