Vantawng Khawthla sàn zawng teh phal lo ; Sorkarin teh tura hmalak zui a tum rih lo

Mizoram Science, Tech­nology & Innovation Coun­cil (MISTIC) hotute chuan an thurualpui pawl dangte nen April 3, 2018 khan Mizorama tui khawhthla sang bera ngaih ṭhin, Vantawng Khawhthla sân zawng teh tumin an kal a, Thenzawl Joint V/C-te'n an lo phal loh avangin an teh thei lo. Hei vang hian MISTIC chuan teh tura hmalak an tum zui rih lo.

Thu dawn danin, Science & Technology department hian Van­tawng Khawthla teh tur hian Thenzawl Joint YMA chu thawhpuiah sáwmin, Joint YMA pawhin teh an remti a; April 3-a teh tura an kal chu Joint V/C-in an lo remti lo a ni. Joint V/C chuan, Vantawng Khawthla chu an khaw ram chhunga mi a ni a, an hnena hriattirna/dilna awm hmasa loa teh an remtih loh thu leh, a san zawng record awm sa chu pawm ve mai turin an lo hrilh a ni.

Science & Technology department hotute'n Thenzawl Joint YMA an biak tawh thu leh YMA chuan an remtih thu an sawi a; Thenzawl Joint V/C hotute chuan YMA chu NGO an ni a, thuneitu zawk chu V/C-te an nih thuin an chháng. Department hotute'n minister-in Vantawng Khawhthla san zawng tichiang tura a hriattir thu an sawi pawh, minister-in Thenzawl V/C-te a hriattir loh thuin an chhang bawk.

Vanglaini palai zawhna chhangin MISTIC-a chief scientific officer Dr RK Lallianthanga chuan, Thenzawl Joint V/C-te'n an phal loh avangin Vantawng Khawthla chu teh tura hmalak zui tumna an neih rih loh thu a sawi.

Dr RK Lallianthanga chuan, MISTIC chu Vantawng Khawthla san zawng leh Mizorama tuikhawhthla san zawng teh a, a san zawng official-a puang theitu an nih bik loh thu a sawi a; chutih rualin, science kaihhnawih thilte a nih avangin teh tuma hma an lak mai thu a sawi.

Vantawng Khawhthla sân zawng hi ft. 750 / 751 tia hriat ṭhin a ni a, mahse, kum 2017-a Zotrek Youth Adventure Club leh Mission Veng Youth Adventurte Club (YAC) ten February 4, 2017-a an tehnaah, ft. 324.8 (metre 99)-a sang angin an teh chhuak a; measuring tape hmang (manual) leh khawl (altimetre) hmangin an teh a ni.

Vantawng Khawthla an teha a san zawng an hmuh chhuah hi Zotrek YAC leh Mission Veng YAC-te chuan August 13, 2017-ah Aizawl Press Club-ah press mite hmaah an puangzar. Chumi hnuah Vantawng Khawthla sân zawng dik tak hriat a nih theih nan Zotrek YAC chuan hma an la a, Science & Technology department changtu minister hnenah thlenin, minister pawhin bawhzui turin department hotute a hriattir a ni. Science &Technology department hian a tehna khawl, khawvela hman tlánglâwn tak an chah thlen hnuah, teh tumin hma an la a ni.

Chutih laiin, Thenzawl Joint YMA chuan July 31, 2017-ah thuchhuah siamin, Zotrek YAC-te'n Vantawng Khawthla an teha a sàn zawng anga an puan chu an pawm loh thu an tarlang ve nghal a, "Tun hnuah Vantawng Khawhthla behchhana adventure lam kaihhnawih emaw, zirchianna eng chi pawh neih tumte tan Thenzawl Joint YMA remtihna la hmasa loin tih a remchang tawh dawn lo," an ti. April 3, 2018-a Science & Technology department-in teh an tum erawh chu Thenzawl Joint YMA hian an remti nia thu dawn a ni.

Zotrek YAC hruaitute chuan, Vantawng Khawhthla sân zawng chu a chiang lo tih sawiin, tun hmain teh a la nih ngai loh thu leh, tuna a san zawng record ft. 750 tih chu khawi aṭanga lo chhuak nge tih hriat theih a nih loh thu an sawi a; tunah sorkarin teh a tum a, a awmna khaw V/C-te'n teh an phal tâk si lohah chuan, Vantawng Khawhthla chu Mizorama tuikhawhthla zingah a tel lo mai ang tih a hlauhthawnawm thu an sawi bawk.