Mission Veng LC-in vawksa rate, lumeh man leh taxi rate an huam chhung atan an bituk

Mission Veng Local Council, YMA branch pahnih, MHIP leh MUP-te telna Joint Committee chuan, an veng huam chhunga taxi rate, vawksa rate, lu meh man tur an bithliah a, chungte chu zawm vek turin an hriattir.

Mission Veng Joint Committee chuan, an veng huam chhunga taxi ding ṭhinte chu February 24, 2015-a Mizoram State Transport Authority (STA)-in March 1, 2015-a hman ṭn tura Aizawl taxi rate a siam - km. khatah Rs. 40 leh a bak km. khat dang zela Rs. 30 belh tura tih leh, December 1, 2017-a STA-in two wheeler taxi rate a siam - km. khatah Rs. 10 leh a bak km. dang zela Rs. 5 belh zel tura tih chu zâwm vek turin an hriatir a ni.

Sorkar rate aia sanga taxi leh two wheeler taxi tlân awm chuan thuneitute hnenah thlen a nih tur thu sawiin, "Sorkar rate siam zawm lote chu Mission Veng chhungah an din phal a ni dawn lo a, a ṭul a nih chuan taxi stand tihbo thlenga hmalak tum a ni," an ti.

Mission Veng Joint Committee chuan, November 10, 2017-a sorkar thuneitu te, Aizawl City Local Council Association hruaitute kaihruaina leh hriatpuinaa Mizoram State Consumer Union (MSCU) leh Aizawl City Vawksa Zuar Inzawmkhawm ten Aizawla vawksa man kg. khat Rs. 280 an bi­thliah chu zâwm vek turin an veng huam chhunga vawksa zuar zawng zawngte an hriattir a; rate bituk aia hralh an awm chuan Mission Veng huam chhungah vawk sa zawrh phalsak an nih loh tur thu an tarlang.

April, 2018 aṭanga hman ṭan tura Mizo Mipa Lumettu Pawlin lu meh man an bithliah thar, Rs. 70 chu a rate hmasa atanga 40%-a pung a nih avangin, a la hun rih loah an ngai a, "A man pang­ngai Rs. 50 kha a la awm tawk rih hlein kan hria a, kan veng ṭhenawm lawkah hnam dang lumet chhawrin, Rs. 50 aia tlâwmin an la mêt zar zar thei bawk a. Kan Mizopui lu mettute hma ngai takin, Mission Veng khawtlang hruaitute chuan, kan veng chhunga lumehna dawr siam rawn dil hnam dangte chu, vawi eng emaw zat kan lo phal sak loh fo tawh thin. Chuvangin, Mission Veng chhunga lu mehna dawr neitu zawng zawngte Rs. 50 la chhunzawm turin kan ngen a ni," an ti.