KMMTTP 96% zawh a ni tawh ; Revised estimate siam leh a ni

India leh Myanmar insumdawn tawnna atana Lawngtlai district-a ram pahnih pawhtu tur kawngpui siam mek Kaladan Multi Modal Transit Transport Project (KMMTTP) chu 96.21% thawh zawh a ni tawh. Hetih lai hian, revised estimate siam leh niin, sorkar laipuiah dilna thehluh a ni.

October 12, 2010-a laih ṭan KMMTTP-ah hian a tirah chuan Mizoram chhungah kawng km. 99.830 siam tur a ni a, sum ruahman (estimate) chu cheng vbc. 575.69 a ni. A hnuah revised estimate siam niin, kawng laih tur chu a tâwi sawt a, km. 90.820 niin, estimate chu cheng vbc. 677.20-ah a kái chho.

Kawngpui siam hna chu hlawm (package) thuma ṭhen a ni a, package I leh III chu RDS Project Ltd.-in an thawk a, package-II chu Atlanta-ARSS (joint venture)-in an thawk thung.

Revised estimate ang chuan kawng siam hna chu June 11, 2016-ah zawh tur a ni a, mahse, tun dinhmunah hnathawh zawh loh 4% vel a la awm a, zawh hun tur tak hriat theih a la ni lo.

PWD document-a a lan danin, KMMTTP kawng laihna tura ram lâkah zángnadawmna phûttute ram sawi zau zawng chu sq.km. 25,940.05 a ni a, chu chu Mizoram pumpui zau zawng sq.km. 21,081 aiin sq.km. 4,859.05-in a zau zawk.

Kawngpui atana ram lâk vanga zángna­dawm­na chungchang chu Anti Corruption Bureau (ACB)-in an chhui a, kum 2020 tàwp lam khan a ṭum hnihna atan court-ah an thil hmuh chhuah (chargesheet)-te an thehlut leh a ni.

Vanglaini palai zawhna chhangin PWD chief engineer (Highways) Lalruatkima chuan, KMMTTP chu 96.21% zawh a nih tawh thu a sawi a, "Hnathawh hmabak lian tham deuh chu lei pakhat dawh a ni mai. Lei pasarih dawh a ni tawh. A bak chu kawng tihzauh deuh leh chei ṭhat deuhte a ni tawh mai," a ti.

Lalruatkima chuan, revised estimate an dil mek thu sawiin, "KMMTTP hi package thumah ṭhen a ni a, package khat atan chuan revised estimate pawm a ni tawh," a ti a; package dang pahnih atana revised estimate pawm a nih theihna atan sorkar laipui an nawr reng thu a sawi.

PWD Chief Engineer chuan, revised estimate pawm la ni lo mah se, hna thawh reng a nih thu sawiin, "Revised estimate siam ngaih chhan ber chu, kawng laih tawh min leh nasa lutuk a tam avang leh compensation avanga hna thawh theih loh hun chhung a tam vangte a ni," a ti.